Skuadra e Milanit ka në duart e veta fatin për avancim nga faza e grupeve të Ligës së Kampionëve. Dueli i xhiros së fundit të fazës grupore me Red Bull Salzburgun është vendimtar për të ardhmen e Milanit këtë edicion në Champions.
Përballja është vendimtare edhe për Salzburgun, ekip që po ashtu e synon kalimin në fazën e nokautit. Milani dhe Salzburgu austriak do të përballen të mërkurën mbrëma (21:00) në stadiumin “San Siro”, në kuadër të Grupit E.
Milanit i mjafton barazimi për ta ruajtur pozitën e dytë në grup, ndërsa Salzburgut për t’u kualifikuar në mesin e 16 ekipeve më të mira të Championsit i duhet patjetër fitorja.
Aktualisht Milani ka shtatë pikë, një më shumë se Salzburgu që renditet i treti. Në vendin e katërt është Dinamo Zagrebi me katër pikë. Skuadra kroate luan në udhëtim te Chelsea që tashmë e ka siguruar kualifikimin në 1/8 e finales. Chelsea udhëheq me 10 pikë.
Trajneri i Milanit, Stefano Pioli, i cili të hënën firmosi kontratë të re me klubin të vlefshme deri në vitin 2025, ka thënë se ekipit të tij i duhet patjetër fitorja. Në konferencën për shtyp të martën, Pioli ka insistuar se me kalimin në fazën e nokautit, Milani do ta arrinte synimin e parë të këtij edicioni.
“Nëse luajmë mirë ndaj Salzburgut dhe fitojmë atëherë do të thotë shumë për ne. Me kalimin në rundin tjetër ne do ta realizonim synimin e parë që e kemi për këtë edicion. Duhet ta shfrytëzojmë këtë rast dhe patjetër ta kalojmë fazën e grupeve. Ekipi e ka parasysh këtë mundësi të madhe dhe futet i motivuar për ta fituar ndeshjen. Përballë kemi një kundërshtar të fortë, i cili sigurisht se do ta kërkojë kualifikimin. Por ne nuk duhet të lejojmë një gjë të tillë”, është shprehur Pioli. “Duhet të sulmojmë prej fillimit të ndeshjes duke pasur parasysh se kundërshtari është shumë i rrezikshëm. Besoj se ndaj Salzburgut do ta kemi paraqitjen më të mirë të mundshme deri më tani në Champions. Pas humbjes në kampionat nga Torino, ekipi duhet patjetër të reagojë dhe pres një gjë të tillë”.
Në duelin e parë të luajtur në Austri në fillim të shtatorit, Milani pati barazuar 1:1 ndaj Salzburgut. Mesfushori italian, Sandro Tonali, ka insistuar se Milani nuk do të futet në ndeshje vetëm për një pikë, e cila i mjafton për të kaluar tutje. Ai ka thënë se Milani duhet patjetër ta fitojë këtë ndeshje për ta mbyllur fazën e grupeve në mënyrën më të mirë të mundshme.
“Mendoj se e meritojmë të avancojmë tutje dhe këtë do ta tregojmë kundër Salzburgut, pavarësisht se është një kundërshtar i fortë. Ne duam ta kalojmë fazën e grupeve, por me fitore. Të gjithë e kemi parasysh se kjo ndeshje duhet të fitohet”, tha Tonali.
Te Salzburgu ndeshjen në “San Siro” po e vlerësojnë finale. Trajneri i Salzburgut, Matthias Jaissle, ka thënë se finalet luhen për t’u fituar. Ai ka insistuar se Salzburgu është i motivuar maksimalisht, ndërsa nuk do të mungojë as përkrahja e tifozëve që kanë udhëtuar për ta mbështetur ekipin në këtë ndeshje tejet të rëndësishme.
“Kjo ndeshje për ne është padyshim një finale dhe finalet ne duam t’i fitojmë. Po ashtu do të kemi edhe përkrahjen e tifozëve tanë, të cilët do të jenë shumë të rëndësishëm ndaj Milanit. Nuk do të jetë ndeshje e lehtë, por ne duhet të fitojmë për shkak se synim e kemi të kualifikohemi tutje. Nuk do të pajtohemi me pjesëmarrjen në Ligën e Evropës. Liga e Kampionëve na tërheq më shumë”, është shprehur Jaissle.
Të mërkurën mbrëma luhen ndeshjet e fundit në grupet E, F, G dhe H.
Real Madridi pret të konfirmohet në krye të grupit F, kur e pret në shtëpi skuadrën e fundit, Celticun, prej orës 18:45. Reali ka dhjetë pikë, një më shumë se RB Leipzigu që renditet i dyti. Salzburgu luan në udhëtim me Shakhtar Donetskun.
Në Grupin H ende nuk është përcaktuar skuadra e parë dhe ekipi që do të luajë në Ligën e Evropës. Paris Saint-Germaini dhe Benfica prijnë me nga 11 pikë dhe ndeshjet e fundit do t’i luajnë në udhëtim. PSG-ja luan në Torino ndaj Juventusit, ndërsa Benfica në Izrael përballet me Maccabin. Juventusi dhe Maccabi ndajnë pozitat tre dhe katër me nga tri pikë dhe synojnë ta vazhdojnë aventurën në Ligën e Evropës.
E mërkurë
Grupi E
Milan – Salzburg (21:00)
Chelsea – Dinamo Z. (21:00)
1. Chelsea 5 10
2. Milan 5 7
3. Salzburg 5 6
4. Dinamo Z. 5 4
Grupi F
Real Madrid – Celtic (18:45)
Shakhtar D. – Leipzig (18:45)
1. Real Madrid 5 10
2. Leipzig 5 9
3. Shakhtar D. 5 6
4. Celtic 5 2
Grupi G
Copenhagen – Borussia D. (21:00)
Man. City – Sevilla (21:00)
1. Man. City 5 11
2. Borussia D. 5 8
3. Sevilla 5 5
4. Copenhagen 5 2
Grupi H
Juventus – PSG (21:00)
Maccabi H. – Benfica (21:00)
1. PSG 5 11
2. Benfica 5 11
3. Juventus 5 3
4. Maccabi H. 5 3
© KOHA. Të gjitha të drejtat janë të rezervuara.
