Xhudoja nuk ndalet, kthime të suksesshme dhe fytyra të reja
Loriana Kuka fitoi medalje të bronztë në Grand Slamin në Abu Dabi
Nora Gjakova e Loriana Kuka gjatë karrierës kanë medalje dukshëm më të mëdha se ato që i fituan këtë javë. Por medaljet në Grand Slamin e Abu Dabit janë me vlerë të jashtëzakonshme për të dy xhudistet.
Kampionia olimpike, Nora Gjakova, dhe medalistja botërore, Loriana Kuka, kanë shënuar rikthim të rëndësishëm në Abu Dabi. Për këtë arsye trajneri Driton Kuka i çmon medaljet nga ky Grand Slam.
Medaljet në Emiratet e Bashkuara Arabe janë dëshmi që xhudoja kosovare nuk ndalet, ndonëse janë arritur të gjitha sukseset e mundshme. Në fakt, sfidë tani është mbajtja e nivelit superior që është arritur prej vitit 2013 e tutje. Dhe kjo sfidë po përballohet me sukses.
Rezultatet e këtij muaji janë dëshmi për këtë.
Ndonëse me mungesa të rëndësishme dhe me disa vendime të befasishme të gjyqtarëve, Kosova në Botërorin e mbajtur në Tashkent të Uzbekistanit fitoi medalje të bronztë. Distria Krasniqi ishte e treta në kategorinë deri 52 kilogramë. Botërori u mbajt më herët këtë muaj.
Laurinë Gashi i gëzohet fitores në finalen e Kupës Evropiane për kadetë
Tani në Grand Slamin në Abu Dabi, që përfundoi të dielën, Kosova fitoi dy medalje. Nora të premten fitoi medalje të argjendtë në kategorinë deri 57 kilogramë, derisa Loriana Kuka të dielën fitoi medalje të bronztë në kategorinë deri 78 kilogramë. Laura Fazliu mbeti pa medalje të shtunën.
Nora nuk kishte garuar për plot 15 muaj, që nga suksesi historik në Tokio, ku kishte fituar të artën olimpike. Ajo ndërkohë i ishte nënshtruar një operimi në krah. Ishte operim i komplikuar, sipas trajnerit Kuka, që përfundoi me sukses. Në garën e parë pas rikthimit, Nora shënoi katër fitore rresht, për t’u ndalur në finale.
Ndërkohë Loriana Kuka ka pasur një krizë në rezultate sa u takon garave të mëdha të xhudos. Në ngjarjet e Turit Botëror të Xhudos nuk kishte fituar medalje që nga janari i vitit 2021. Ajo në fakt ka fituar dy të arta këtë vit, por jo në ngjarjet më të vlerësuara të xhudos. E para ishte në një Kupë Botërore në Sarajevë dhe në Lojërat Mesdhetare në Oran të Algjerisë.
Për medalje të bronztë Loriana e mposhti veteranen franceze, Audrey Tcheumeo. Lufta nuk ishte shumë e bukur, por ishte e fortë taktikisht. Të dy xhudistet zhvilluan luftë të fortë për gard dhe sa më shumë që shkonin minutat më e qartë bëhej se lufta do të vendosej me dënime. Në fund dënimin e tretë e mori Tcheumeo, xhudistja me dy medalje olimpike. Ajo ishte edhe kampione e botës, fituese e medaljeve botërore dhe fituese e shumë medaljeve të arta olimpike. Ndërsa karriera e francezes po shkon drejt fundit, prej Lorianës ende pritet më e mira. Ajo ka fituar medalje të bronztë botërore e evropiane, por synimi i madh mbetet medalja olimpike.
Loriana ditën e përfundoi me katër fitore e një humbje. Humbjen e pësoi në çerekfinale.
“Lufta e fundit ishte shumë taktike. Realisht Loriana pas operimit të gjurit në pranverë është në ngritje. Por ende nuk është në formën e duhur, formën që e kërkoi unë si trajner”, ka thënë Driton Kuka për KOHËN, të dielën.
“Medalja e Lorianës ka vlerë të shumëfishtë. Së pari, pas dy vjetësh ajo po iu kthehet medaljeve në nivelin më të lartë. Pastaj, kjo medalje i siguron edhe 490 pikë në ranglistën olimpike, që janë me shumë vlerë për këtë moment. Fitoret ndaj xhudisteve nga Anglia, Italia e Franca dëshmojnë që niveli i Lorianës është në ngritje”, ka shtuar Kuka.
Ai është i kënaqur me zhvillimin e gjithë xhudisteve. Trajneri Kuka ka rezervat e tij për mënyrën se si po paraqitet Laura Fazliu, por ka besim të plotë në potencialin e saj. Ka premtuar se do të angazhohet më shumë që paraqitja e Laurës në luftëra të jetë e nivelit dukshëm më të lartë se aktualisht.
“Medaljet në këtë fazë, në fillim të ciklit olimpik, janë me shumë rëndësi. Krijohet një komoditet, fitohet një siguri që për përgatitjet finale para Lojërave Olimpike është shumë e rëndësishme”, ka theksuar Kuka.
Aktualisht i lënduar është Akil Gjakova, ndërsa normën olimpike pos tij e kërkojnë Nora, Distria, Loriana, Laura, Flaka Loxha, Erza Muminoviq e ndonjë tjetër.
Por me këta nuk përfundon rrëfimi i suksesit të xhudos.
Në fundjavë u mbajt një kupë evropiane për kadetë (U18). Gara u mbajt në Riga të Letonisë, ndërsa Kosovën e përfaqësoi një xhudiste që po vjen, Laurinë Gashi. Ajo fitoi medaljen e artë në kategorinë deri 52 kilogramë, kategorinë ku Majlinda Kelmendi arriti sukseset kulmore e tani po shkëlqen Distria Krasniqi.
Laurina është xhudiste e klubit Kodokan nga Peja, ndërsa trajner e ka Dukagjin Gashin, një ish-xhudist me nivel. Për Laurinën ishte medalja e parë e artë në garat serioze për kadetë. Ka fituar medalje tjera më herët.
Ajo fillimisht e mposhti finlandezen Pihla-Maria Seikkula. Më pas fitoi ndaj ukrainases Mariia Vasiuta, kurse në finale e mposhti lituanen Rugile Marozaite.
Është me shumë rëndësi që tani po dalin xhudistë e xhudiste edhe në klubet e tjera. Natyrisht klubi “Ippon” nga Peja, ku janë gjithë xhudistët elitarë, qëndron dukshëm prapa klubeve të tjera, por tashmë po ka lëvizje edhe në mjediset e tjera të xhudos. Në Federatën e Xhudos së Kosovës janë të bindur se pasi të fillojë implementimi i programit “Kosova, shtet i xhudos”, sukseset ndërkombëtare do të shtrihen edhe në klubet dhe qytetet e tjera. Ky në fakt edhe është një prej qëllimeve të këtij programi shtetëror të Kosovës.
