Sport

E bronzta e Cenës në Evropian, dëshmi se ekipi i xhudos po rritet

 

Driton Kuka nuk dyshon në potencialin e Dardan Cenës, xhudisti 19-vjeçar, që para katër vjetësh la Prishtinën për ta mësuar xhudon në Pejë, nën urdhrat e tij. Por Kukën e ka befasuar paraqitja që Cena kishte të premten në Kampionatin Evropian për juniorë, që po mbahet në Pragë të Çekisë.

Dardan Cena, djalë i ish-xhudistit Anton Cena, ka fituar medaljen e bronztë në kategorinë deri 73 kilogramë. Bëhet fjalë për njërën prej kategorive me konkurrencën më të madhe. Dardani nuk ishte në mesin e bartësve, por shfaqi xhudo të nivelit të lartë dhe bëri që edhe një ngjarje e rëndësishme të jetë e suksesshme për Kosovën.