LTrajneri i Chelseat, Thomas Tuchel, ka këmbëngulur se Antonio Conte ishte fajtor për grindjen e tyre me plot zemërim në fund të ndeshjes në të cilën Chelsea barazoi 2:2 me Tottenhamin.
Tottenhami i Contes në mënyrë kontroverse mori barazimin 2:2 ndaj Chelseat të Tuchelit, në “Stamford Bridge”. Por grindjet mes trajnerëve lanë disi në hije rezultatin e derbit të Londrës. Të dy u ndëshkuan me kartonë të kuq pas fundit të ndeshjes, të dielën.
Përplasja e madhe ndodhi pas fundit të ndeshjes. Pasi shtrënguan dorën e njëri-tjetrit, trajnerët nuk i lëshuan ato dhe për pak mungoi që konflikti të jetë fizik. Për ndërhynë lojtarët e dy skuadrave e po ashtu zytarë të ekipeve.
Duke folur në konferencë për shtyp pas ndeshjes për kartonin e kuq, Tuchel ka thënë: “Mendova që kur shtrëngoni duart shikoni njëri-tjetrin në sy. Antonio (Conte) kishte ide tjera. Një tjetër vendim i keq nga arbitri sot”.
Gjermani, që dukej më i palumtur me arbitrin Anthony Taylor se me Conten, ka kritikuar vendimet e gjyqtarëve me rastin e golave të Tottenhamit.
“Asnjëri gol nuk është dashur të pranohet. Vetëm një ekip e ka merituar fitoren, ekipi ynë. Nuk e di sa faula taktikë i kanë bërë Hojbjerg dhe Bentancur sot. Prej kur mund të shkulim flokët në një ndeshje futbolli? Ata kontrolluan dhe asgjë nuk ndodhi. Shumë qesharake. Unë nuk mund të kuptojë, e gjithë zhveshtorja nuk mund të kuptojë. Jam i frustruar që lojtarët nuk morën shpërblimin që e merituan. Varemi nga këto vendime të pabesueshme. Ndoshta do të ishte më mirë (që Taylor mos të drejtojë ndeshjet e Chelseat). Por e kemi VAR-in”, ka theksuar Tuchel.
Conte është përgjigjur: “Për mendimin tim më mirë është të flasim për ndeshjen. Nuk dua të komentoj për situatën, nëse ka një problem që është në mes meje e atij (Tuchel) dhe askujt tjetër. Arbitri më tregoi kartonin e kuq, por ai nuk ka kuptuar dinamikën e asaj që ndodhi. Është në rregull, duhet ta pranojë atë. Nuk është problem i madh”.
Dy trajnerët u përballën fillimisht pas golit të barazimit të shënuar nga Pierre-Emile Hojberg. Tuchel sugjeroi që Kai Havertz u faulua nga Rodrigo Bentancur gjatë ndërtimit të aksionit. Edhe përplasja e parë ishte e ashpër.
Për incidentin e parë të dy trajnerët u ndëshkuan me kartonë të verdhë. Tuchel vrapoi para Contes gjatë festës së golit të dytë të Chelseat. Por Tottenhami siguroi një tjetër barazim, në minutën e fundit dhe beteja mes trajnerëve u ringjall. Trajnerët u afruan me fytyrë, përpara se të ndaheshin nga të tjerët.
Jamie Carragher ishte komentator në Sky i ndeshjes dhe foli për incidentin.
“Njerëzit thonë që nuk pëlqejnë skena të tilla, por dua të them se më pëlqen kjo, të shoh këtë. Dua më shumë nga kjo. Çfarë lige kemi. Kjo paraqet Premier Leaguen brenda dhe jashtë fushës. Absolutisht fantastike, nuk mund të largoni sytë për asnjë minutë”, ka theksuar Carragher, legjenda e futbollit anglez.
© KOHA. Të gjitha të drejtat janë të rezervuara.
