4 perditesime
19:00

Trepça ’89 barazon me nënkampionen

Ndeshja e parë e Trepçës ’89 në edicionin e parë pas rikthimit në Superligë përfundoi baras.

Mitrovicasit të shtunën barazuan me skuadrën gjilanase që ishte nënkampione e edicionit të shkuar, Dritën. Ballafaqimi përfundoi 2:2 në stadiumin “Riza Lushta” në Mitrovicë.

Christian Mba shënoi dy golat për skuadrën e ’89shit. Mba realizoi në minutat 36’ dhe 38’.

Për Dritën realizuan Drilon Islami në minutën e 70-të dhe Ardit Tahiri nga penalltia në minutën e 85-të.

Në xhiron e dytë, Trepça ’89 udhëton te Llapi, kurse Drita e pret Dukagjinin.

18:47

Drita barazon shifrat me Trepçën ’89

Skuadra e Dritës ka barazuar shifrat në udhëtim te skuadra e Trepçës ’89.

Gjilanasit shënuan nga penalltia nëpërmjet Ardit Tahirit, zëvendësuesit i cili vetë e fitoi penalltinë dhe mori përsipër ekzekutimin në minutën e 85-të.

Tahiri në minutën e 82-të pati një duel me Rilind Nimanin, ndërsa Visar Kastrati sinjalizoi në 11-të metërsh.

Penalltia mbeti në fuqi pas rishikimit të sistemit VAR.

Rezultati i ndeshjes Trepça ’89 – Drita është 2:2.

18:44

Drita ngushton epërsinë me Islamin

Skuadra nënkampione e Kosovës, Drita, ka arritur që ta ngushtojë rezultatin në udhëtim te Trepça ’89.

Gjilanasit arritën që në stadiumin “Riza Lushta” në Mitrovicë, të shënojnë në minutën e 70-të nëpërmjet Drilon Islamit.

Rezultati aktual është 2:1 në të mirë të Trepçës ’89.

17:55

Mbyllen pjesët e para, Trepça ’89 befason Dritën

Janë mbyllur pjesët e para të tri ndeshjeve të para të elitës së futbollit të Kosovës. Mitrovicasit e Trepçës ’89 kanë befasuar gjilanasit e Dritës pas 45 minutave të para.

Christian Mba i ka dërguar vendësit me epërsinë e dy golave, pasi shënoi në minutat 36’ dhe 38’.

Të shtunën po zhvillohen edhe dy takime tjera, ai ndërmjet Dukagjinit e Prishtinës, si dhe Gjilanit e Ferizajt.

Pjesa e parë në Klinë ndërmjet Dukagjinit e Prishtinës është mbyllur 1:1. Për Prishtinën, supergol realizoi Endrit Krasniqi në minutën e 27-të. Ishte goli i parë i edicionit të ri 2022/23. Shifrat për klinasit i barazoi Ahmed Januzi në minutën e 40-të.

Ndërkohë, Gjilani dhe Ferizaj kanë luajtur baras po ashtu në pjesën e parë, 1:1. Mevlan Zeka shënoi për 1:0 për skuadrën e Gjilanit në minutën e 24-rt, kurse Ramush Ramadani barazoi shifrat në minutën e 35-të nga afërsia.

17:40

Dy gola të shpejtë të ’89-shit ndaj Dritës

Trepça ’89 e ka befasuar Dritën në stadiumin “Riza Lushta” në Mitrovicë, duke shënuar e para në xhiron e parë të edicionit të ri të Superligës së Kosovës në futboll.

Dy golat për mitrovicasit i realizoi Christain Mba.

Ai shënoi në minutat 36 dhe 38.