Eintracht Frankfurti është fitues i Ligës së Evropës. Frankfurti fitoi me penallti ndaj Rangersit. Pas 120 minutave lojë, rezultati ishte 1:1. Me penallti ekipi gjerman fitoi 5:4. Aaron Ramsey ishte i vetmi që nuk realizoi nga pika e bardhë. Kevin Trapp ndali gjuajtjen e tij.
Për Ramseyn ishte vetëm penalltia e dytë e humbur në karrierë. Por i kushtoi Rangersit me humbje.
Frankfurti ka fituar trofeun e parë evropian që nga viti 1980.
23:42
Finalja vendoset me penallti
Penalltitë do të vendosin fituesin e ndeshjes Frankfurt – Rangers.
Pas 120 minutave lojë rezultati i finales së Ligës së Evropës është 1:1.
Në vazhdimin e dytë më shumë rrezikoi Rangersi, por pa mundur të realizoi.
23:24
Pa gola në vazhdimin e parë
Nuk janë shënuar gola në vazhdimin e parë të ndeshjes Frankfurt –Rangers.
Rezultati i finales së Ligës së Evropës mbetet 1:1, që ishte edhe pas 90 minutave lojë.
Skuadrat kanë edhe 15 minuta për të fituar finalen në Sevilla.
23:01
Luhen vazhdimet në finalen dramatike
Finalja e Ligës së Evropës ndërmjet Frankfurtit dhe Rangersit nuk ka dhënë fitues në kohën e rregullt.
Rezultati është 1:1 në ndeshjen interesante dhe me tempo të lartë.
Në ndeshjen që po luhet në Sevilla, janë krijuar shumë raste shënimi, por skuadrat e kanë shënuar vetëm nga një gol. Edhe shfaqja e shikuesve në tribuna është e veçantë.
Tani do të luhen dy vazhdime nga 15 minuta. Nëse sërish nuk ka fitues, atëherë ekzekutohen penalltitë.
22:37
Frankfurti barazon rezultatin
Frankfurti gjerman është kthyer në lojë në finalen e Ligës së Evropës ndaj Rangersit.
Në minutën e 69-të Rafael Borre barazoi shifrat në 1:1. Borre shënoi nga afërsia.
22:24
Rangers në epërsi ndaj Eintracht Frankfurtit
Rangers ka kaluar në epërsi ndaj Eintracht Frankfurtit në finale të Ligës së Evropës. Gabimin e mbrojtjes së ekipit gjerman e shfrytëzoi sulmuesi Joe Aribo.
Ai nuk dështoi përballë portierit të klubit gjerman, Kevin Trapp.
Golin e epërsisë e shënoi Aribo në minutën e 57-të.
21:56
Mbyllet pa gola pjesa e parë e finales së Ligës së Evropës
Pjesa e parë e finales së Ligës së Evropës ndërmjet klubit gjerman, Eintracht Franfurtit dhe atij skocez, Rangers, ka përfunduar pa gola.
Finalja e Ligës së Evropës është duke u zhvilluar në stadiumin e Sevillas, “Estadio Ramon Sanchez Pizjuan”.
Ekipi gjerman kishte disa raste shënimi, por nuk arriti të shënoi gol.
