Prizreni-16 e ka fituar ndeshjen e parë çerekfinale të plejofit në Ligën Unike, i cili ka nisur të mërkurën mbrëma.
Në ndeshjen e luajtur në palestrën “Mizahir Isma” në Rahovec, ekipi prizrenas ka triumfuar me shifrat 98:93.
Në këtë seri çerekfinale zhvillohen nga dy ndeshje, ndërsa ekipi me bilancin më të mirë kualifikohet në gjysmëfinale.
Me këtë fitore, Prizreni-16 ka bërë një hap para për kalim në fazën gjysmëfinale.
Kontribut të madh në këtë fitore të Prizrenit-16 dha Arti Hajdari, i cili ndeshjen e mbylli me 27 pikë. Me lojë të mirë te mysafirët, u veçuan edhe Darrell Davis (23 pikë, 12 kërcime, 9 asistime), Robert McCoy (20 pikë, 10 kërcime) e Xa vier Cannefax (14 pikë e 11 kërcime).
Te Rahoveci, më të dalluarit ishin TJ Dunans me “double-double” prej 24 pikëve e 17 kërcimeve, i përcjellë nga Musab Mala (22 pikë) dhe Fisnik Rugova (16), por që nuk mjaftuan për të evituar humbjen.
Në çerekfinalen tjetër, Tirana e ka mposhtur skuadrën e Teutës me rezultatin 98:81. Në gjysmëfinale të plejofit të Ligës Unike, tashmë janë kualifikuar Golden Eagle Ylli dhe Peja, ekipe që pjesën e rregullt e kanë përfunduar në dy pozitat e para në tabelë.
© KOHA. Të gjitha të drejtat janë të rezervuara.
