Gazeta zvicerane shkruan për problemet e kryetarit të FFK-së me ligjin
“Para ndeshjes që Kosova e luan kundër Zvicrës sot (18:00) në stadiumin “Letzigrund” të Zueriuch, në futbollin kosovar po zhvillohet një luftë e madhe për pushtet”.
Kështu thotë paragrafi i parë i gazetës së madhe zvicerane “Blick” kushtuar kryetarit aktual të FFK-së, Agim Ademi.
Në shkrimin e publikuar të martën në formatin e shtypur dhe online, është raportuar për zhvillimet e fundit në FFK.
Në hyrje të tekstit raportohet për arrestimin e kryetarit Ademi pas dyshimit për sulm fizik ndaj zyrtarit të FFK-së, Artan Govori, ndërsa është shkruar po ashtu edhe për problemet që kryetari Ademi ka me ligjin lidhur me një rast tjetër.
“Blick” ka ndarë një deklaratë të Ademit para ndeshjes që do të luhet sot në Zuerich të Zvicrës.
“Ne i detyrohemi shumë Zvicrës. Jo vetëm sportistët. Prandaj jemi shumë të kënaqur që është arritur të aranzhohet miqësorja. Do të jetë një festë për të gjithë të përfshirët”, citohet të ketë thënë Ademi për “Blick”.
Pas deklaratës së Ademit, “Blick” e mbyll shkrimin me fjalinë se “Ademi përpiqet të minimizojë trazirat që e rrethojnë personin e tij”.
