Majlinda Kelmendi, përmes një ceremonie shtetërore, sot do të pensionohet si xhudiste aktive.
Me këtë rast, do të organizohet një ceremoni nga presidentja e Kosovës, Vjosa Osmani, e cila do të mbahet ne Institutin "Ali Hadri" në Prishtinë, me fillim në ora 18:00.
Kelmendi konsiderohet gjerësisht si një nga garueset më të mëdha të sportit të saj ndonjëherë. Por, ndoshta xhevahiri i vërtetë dhe i ndritshëm në kurorën e saj erdhi në Lojërat Olimpike “Rio 2016” ku ajo u bë fituese e medaljes së artë dhe e para për Kosovën që e arriti këtë sukses.
Gjatë karrierës së saj, kosovarja u bë dy herë kampione e botës; pushtoi kontinentin për t'u bërë katër herë kampione evropiane dhe në një seri dominimi të plotë, ajo fitoi katër herë titullin më garën e famshme të Grand Slamit të Parisit. Ishte xhudistja e shpallur më e mira në botë në vitin 2017.
Por në vitet e fundit, siç edhe vetë xhudistja kishte treguar, ajo luftoi me probleme të shumta fizike, që nuk e lejuan të kishte shkëlqimin e duhur dhe pas humbjes dëshpëruese në rrethin e parë të Lojërave Olimpike “Tokio 2020”, ajo vendosi të tërhiqej.
Emri i Majlinda Kelmendit është gdhendur në historinë e sportit kosovar, derisa ajo do të vazhdojë punën si trajnere përkrah mentorit të saj, Driton Kuka.
