Në ditën kur të gjithë shqiptarët kanë festuar Ditën e Flamurit, në veri të Kosovës është bërë edhe një shkelje ndaj integritetit të shtetit. Të dielën ka nisur edhe një ligë ilegale sportive, përkatësisht një garë që është nën ombrellën e sistemit sportiv të Serbisë.
Në sallën e sportit, në pjesën veriore të Mitrovicës, janë luajtur ndeshjet e xhiros së parë të ligës së ashtuquajtur të “Kosovës e Metohisë” në futsall. Ndeshjet dhe ligën e organizon e ashtuquajtura “Federatë e Futbollit e Kosovës e Metohisë” që ka shtrirje në territorin e Kosovës, ndonëse jo të ligjshme.
Në sallën sportive, në pjesën veriore të Mitrovicës, ishin të shpalosur të paktën dy flamuj të mëdhenj të Serbisë, ndërsa janë lëshuar edhe këngë nacionaliste serbe që Kosovën e shohin pjesë të Serbisë.
Fillimisht janë takuar skuadra “Zveçani” dhe ajo “Kolashinac” (Kolashini) nga Zubin-Potoku. Fitore me rezultatin 7:3 shënoi skuadra “Kolashinac”. Në ndeshjen e dytë u përballën skuadra “Tango 038” nga Graçanica dhe ajo “Ujqërit nga Ibri” nga Mitrovica. “Ujqërit nga Ibri” fituan me rezultatin 3:2, ka njoftuar e ashtuquajtura “Federatë e Futbollit e Kosovës dhe Metohisë”. Ndeshjet janë luajtur para qindra shikuesve.
Liga e “Kosovës dhe Metohisë” është një prej pesë ligave regjionale që organizohen nga Serbia. Është niveli i katërt i garave në futsall. Thuajse të gjitha klubet e futsallit (futbollit të sallës) që luajnë në ligën ilegale “të Kosovës e Metohisë” janë formuar në javët e fundit.
“Mbrëmë, në sallën e sporteve në Mitrovicë të Kosovës, është luajtur xhiroja e parë e ligës së futsallit të Kosovës dhe Metohisë. Salla përplot dhe ambienti i bukur ka bërë që të jemi më së shumti krenarë dhe kjo na ka lënë më së shumti përshtypje. Edhe një herë është dëshmuar se Mitrovica dhe mitrovicasit janë të uritur për ndeshje dhe ngjarje sportive. Shfaqja e shkëlqyeshme sportive dhe dy ndeshjet e shkëlqyera ishin qershia mbi tortë e gjithë asaj që ndodhi mbrëmë”, ka njoftuar e ashtuquajtura “Federatë e Futbollit e Kosovës dhe Metohisë”.
“Me këtë rast i falënderojmë të gjithë ata që ishin të pranishëm në sallën sportive dhe shpresojmë që në ndeshjet e ardhshme do të ketë edhe më shumë shikues”.
Serbia organizon gara sportive në territorin e Kosovës edhe në sporte të tjera. Në muajt e fundit shumë prej ndeshjeve të skuadrave nga territori i Kosovës ishin zhvendosur në Serbi, në qytetet e afërta me kufirin e Kosovës. Por edhe në Kosovë janë zhvilluar disa aktivitete ilegale të federatave serbe.
Organizimi i një kampionati të ri të Serbisë në territorin e Kosovës erdhi pasi institucionet e shtetit lëshuan një kërcënim për organizimin e aktiviteteve ilegale.
Ishte Këshilli Kombëtar për Parandalimin dhe Sanksionimin e Dhunës dhe Dukurive Negative në Ngjarjet Sportive që kishte diskutuar për aktivitetet sportive të Serbisë në territorin e Kosovës. Ky këshill kishte lëshuar një komunikatë më 26 tetor, ku kishte nxjerrë disa rekomandime për mënyrën e ndërprerjes së aktiviteteve ilegale.
“Këshilli paralajmëron të gjitha klubet që nuk janë pjesë e Federatave Nacionale të Kosovës se për organizimin e aktiviteteve ilegale sportive do të jenë të detyruar që të zbatojnë ligjet e Kosovës, ku parashihen edhe sanksionet ndaj personave apo subjekteve që nuk i zbatojnë ligjet e Republikës së Kosovës”, shkruante në fund të komunikatës.
Është e qartë se ligjet e Kosovës nuk janë respektuar të dielën mbrëma në Mitrovicën Veriore. Përkundrazi, janë shkelur rëndë ato.
FFK-ja sa herë që është aktualizuar kjo çështje nga mediat është mjaftuar me “dënimin e aktiviteteve ilegale” dhe kryesisht ka premtuar se do t’i drejtohet UEFA-s e FIFA-s.
KOHA të hënën ka kërkuar qëndrim të FFK-së dhe të Këshillit për shkeljen e fundit, përkatësisht për nisjen e një lige të re të një shteti tjetër në territorin e Kosovës.
© KOHA. Të gjitha të drejtat janë të rezervuara.
