Gjilani fiton derbin dhe shkëputet në krye të tabelës
14:50
Gjilani fiton derbin dhe shkëputet në krye të tabelës
Skuadra e Gjilanit ka fituar derbin ndaj Dritës, që u zhvillua të enjten në kuadër të xhiros së 15-të të Superligës së Kosovës në futboll.
Golin e vetëm në këtë takim, e shënoi mesfushori Albert Dabiqaj në minutën e 48-të. Dabiqaj me të pranuar topin në zonë, u tregua i shpejtë për ta mposhtur portierin Faton Maloku.
Me këtë fitore, Gjilani shkëputet në krye të tabelës me 28 pikë të mbledhura, tri më shumë se Drita që ka rënë në pozitën e tretë.
14:14
Gjilani në epërsi ndaj Dritës
Skuadra e Gjilanit e ka nisur pjesën e dytë në mënyrën më të mirë të mundshme, pasi ka kaluar në epërsi.
Në minutën e 48-të, mesfushori Albert Dabiqaj pranoi top në zonë dhe mposhti portierin Faton Maloku.
Goli i Gjilanit u konfirmua edhe pas rishikimit me sistemin VAR, pasi dyshohej për pozitë jashtë loje.
13:57
Nuk ka gola në pjesën e parë në derbin e Gjilanit
Është mbyllur pa gola pjesa e parë në ndeshjen derbi të xhiros së 15 në Superligën e Kosovës në futboll, ndërmjet Gjilanit dhe Dritës.
Gjatë 45 minutave të para, asnjëra prej skuadrave nuk patën ndonjë rast konkret shënimi. Megjithatë, në minutën e fundit të pjesës së parë, mesfushori Rron Broja i Dritës nuk reagoi si duhet para portës së portierit të Gjilanit, Enea Koliçit.
Si Gjilani ashtu edhe Drita, aktualisht kanë pikë të barabarta dhe renditen në dy pozitat e para në tabelë.
