Skuadra e hendbollit Istogu në konkurrencën e femrave, në një atmosferë pozitive po vazhdon përgatitjet për ndeshjet në Kupën Evropiane. Hendbollistet e Istogut do të luajnë në rrethin e dytë ndaj skuadrës nga Islanda, KA/Por.

Te skuadra istogase optimizmi është i madh për të pasur sukses këtë edicion në garat evropiane. Për Istogun, njërën prej skuadrave më të mira në vend, kjo do të jetë paraqitja e gjashtë në garat ndërkombëtare. Trajneri Faruk Shala ndeshjet ndaj skuadrës KA/Por i ka vlerësuar shumë të vështira. Mirëpo ai ka insistuar se ekipi është në përparësi për shkak se të dyja ndeshjet i luan në shtëpi. Megjithatë, ai ka pranuar se nuk do të jetë aspak lehtë përballë ekipit nga Islanda që konsiderohet favorit.

“Përgatitjet kanë shkuar shumë mirë deri më tani. I kemi vështirësitë pasi fillimi i çdo kampionati i ka vështirësitë e veta. Ne besoj se i kemi bërë përgatitjet e duhura për këtë takim. Natyrisht, dëshira ime dhe e gjithë klubit është të bëjmë paraqitje sa më të mirë në këto dy ndeshje pasi edhe në ndeshjet e kaluara kemi treguar paraqitje të mira dhe shpresojmë që kështu do të jetë edhe këtë vit”, është shprehur trajneri Shala, i cili ka premtuar se lojtaret e tij do të japin më të mirën nga vetja në të dy ndeshjet . “I kemi disa lëndime, por kjo është ndeshje e Kupës së Evropës dhe ne duhet të luftojmë me të gjithë potencialin që kemi. Ne shpresojmë që për hir të sportdashësve dhe të gjithë dashamireve të hendbollit, që të kemi një paraqitje sa më të mirë dhe nëse është e mundur të marrim rezultat pozitiv. E dimë se kemi të bëjmë me një kundërshtar të fortë, por ne premtojmë se do të japim më të mirën të mundshme dhe nuk do të dorëzohemi për asnjë moment”.

Hendbollistet e Istogut janë duke bërë përgatitjet e fundit para dy ndeshjeve që luhen të premten e të shtunën. Hendbollistja Pranvera Ferataj shpreson që të arrihen rezultate pozitive në të dy përballjet.

“Besoj që jemi përgatitur mjaft mirë për këto dy ndeshje. Jemi në raundin e dytë dhe shpresojmë ta kalojmë. Atmosfera në skuadër është mjaft e mirë, jemi përgatitur dhe tani është koha ta tregojmë atë në parket. Përparësi e jona do të jetë pasi luajmë dy ndeshje në shtëpi dhe shpresojmë që me ndihmën e publikut tonë të arrijmë të kalojmë në rrethin tjetër”, ka thënë hendbollistja Ferataj.

E bindur se do të arrihen rezultate pozitive është shprehur edhe Yllka Shatri. Hendbollistja nga Istogu beson se me përkrahjen e tifozëve do te vijnë deri te rezultati pozitiv në të dy takimet. Edhe Shatri ka pranuar se përballë kanë një ekip shumë të fortë, por ka shtuar se nuk do të dorëzohen lehtë duke pasur parasysh se luajnë në shtëpi.

“Besoj se angazhimi do të jetë i madh prej të gjitha vajzave dhe së bashku do të luftojmë deri në fund. E dimë që do të jetë një ndeshje shumë e fortë, por asnjëherë nuk do të dorëzohemi dhe do të luftojmë deri në sekondën e fundit. Përparësia është e jona pasi luajmë në vendin tonë në Istog, në palestrën tonë dhe presim më të mirën në këtë përballje”, ka shtuar Shatri.

Ndeshjen e parë ndaj skuadrës islandeze, Istogu e luan të premten nga ora 18:00, ndërsa të dytën të shtunën. Plot shtatë skuadra të hendbollit garojnë këtë edicion në Kupën Evropiane. Trepça e Vëllaznimi janë eliminuar muajin e kaluar, ndërsa këtë javë garojnë edhe Besa Famgas te hendbollistët dhe Vushtrria e Prishtina te hendbollistet. Ferizaj i luan ndeshjet javën e ardhshme.