Tucheli paralajmëron se Lukaku është gati për Arsenalin

Starti i dobët i Arsenalit këtë edicion në Premier League mund të bëhet edhe më i keq, pasi trajneri i Chelseat, Thomas Tuchel ka paralajmëruar se transferimi rekord i klubit, sulmuesi Romelu Lukaku është i gatshëm për debutim të dielën. Lukaku u kthye te Chelsea pas shtatë vjetësh, me klubin londinez që pagoi 115 milionë euro për ta transferuar nga Interi, ekip të cilin belgu e ndihmoi ta fitonte titullin e kampionit në Serie A për herë të parë pas vitit 2010. Te Chelsea, janë të bindur se Lukaku mund të jetë arma e fundit, e nevojshme për ta fituar titullin e kampionit të Anglisë. Dueli mes Arsenalit dhe Chelseat, zhvillohet të dielën prej orës 17:30 në stadiumin “Emirates”. Chelsea në këtë ndeshje do të jetë pa mesfushorin Christian Pulishiq që të premten ka rezultuar pozitiv me koronavirus, por të gatshëm për lojë do të jenë edhe Hakim Ziyech e N’Golo Kante që munguan në ndeshjen e parë ndaj Crystal Palacet.

“Situata me Pulishiqin është shumë e lehtë për t’u shpjeguar, pasi ai ka dalë pozitiv dhe tashmë është izoluar. Hakimi dhe N’Golo kanë stërvitur mirë ditët e fundit dhe nuk kanë pasur telashe, që do të thotë se ata do të jenë në ekip ndaj Arsenalit”, tha trajneri i Chelseat, Thomas Tuchel që pastaj foli për Lukakun. “Lukaku ka pasur stërvitje të ngarkuara sepse është ardhur me vonesë. Ai do të jetë gati për ndeshjen ndaj Arseanlit dhe besoj se është pjesa që i ka munguar ekipit tonë. Romelu është profili i sulmuesit që e kemi kërkuar dhe prej tij presim gola, pasi për këtë punë është ardhur. Ndeshja me Arsenalin është një derbi i vërtetë, ne jemi përgatitur mirë dhe do të mundohemi ta fitojmë me një paraqitje të mirë. Por, duhet të jemi të përqendruar, sepse Arsenali është kundërshtar është i rrezikshëm”.