Paraqitja në garat ndërkombëtare nuk është diçka e re për Dritën. Në edicionet e kaluara Drita mori pjesë në kualifikimet e Ligës së Kampionëve dhe Ligës së Evropës. Përvojën ndërkombëtare synon ta shfrytëzojë përballë skuadrës shqiptare të Malit të Zi, Deçiq. Për Deçiqin do të jetë hera e parë që merr pjesë në gara evropiane. Drita të enjten prej orës 20:00 e pret në stadiumin “Fadil Vokrri” Deçiqin, në kuadër të raundit të parë të Ligës së Konferencës, ndërsa rreth 90 kilometra larg Prishtinës, fituesi i Kupës së Kosovës, Llapi luan kundër skuadrës shqiptare të Maqedonisë së Veriut, Shkupit. Ndeshja do të luhet në stadiumin “Toshe Proeski Arena” në Shkup. Edhe për Llapin, si për Deçiqin, do të jetë hera e parë që merr pjesë në garat evropiane. Te Llapi mbështeten në unitetin në skuadër. Trajneri i Dritës, Ardian Nuhiu e ka vlerësuar Deçiqin, por ka thënë se ekipi i tij është gati.
“Kemi bërë një fazë të mirë përgatitore, dhe lojtarët e rinj janë ambientuar me grupin. Kemi pasur kohë të mjaftueshme të analizojmë kundërshtarin, që është një ekip i mirë që ka bërë një vit të jashtëzakonshëm në Mal të Zi. Është ekip me lojtarë cilësorë, dhe që ka pranuar më së paku gola në kampionat. Ekipi ynë është gati për këtë ndeshje dhe pres reagimin e ekipit. Mendoj që grupi ynë ka aftësi dhe kualitet për të ecur tutje”, tha Nuhiu, që konfirmoi mungesën e Hamdi Namanit e Kastriot Rexhës për shkak të lëndimeve.
Për Dritën është edicioni i tretë që merr pjesë në garat ndërkombëtare. Në edicionin 2018/2019 e kaloi me sukses fazën parakualifikuese të Ligës së Kampionëve. Por u eliminua nga Malmo në raundin e parë kualifikues të “Championsit”, ndërsa vazhdoi garat në raundin e dytë të Ligës së Evropës për t’u eliminuar nga Dudelange. Drita shkaku i rasteve me koronavirus nuk arriti ta kalonte raundin parakualifikues edicionin e kaluar. E fitoi ndeshjen e parë, por të dytën e humbi me rezultatin zyrtar 3:0 nga Linfieldi. Në raundin e dytë të Ligës së Evropës eliminoi Sileksin e Maqedonisë së Veriut, kurse u eliminua në raundin e tretë nga Legia e Varshavës. Ky është edhe suksesi më i madh deri më tash nga klubet e Kosovës në garat evropiane. Për Dritën do të jetë hera e parë që merr pjesë në Ligën e Konferencës. Në fakt, është edhe edicioni i parë i këtij formati të ri të UEFA-s. I bie të jetë niveli i tretë i garave evropiane, pas Ligës së Kampionëve dhe Ligës së Evropës. Të enjten mbrëma luan edhe skuadra tjetër e Kosovës. Llapi do të luajë në udhëtim ndaj Shkupit, kurse trajneri Tahir Batatina thotë se përvoja i takon Shkupit, por përparësi i jep skuadrës së tij.
“E shoh një ndeshje të vështirë, pasi luajmë ndaj një kundërshtari që e ka përvojën e pjesëmarrjes në Evropë, por nuk i frikësohem, sepse ne nuk duhet të gjejmë justifikim, pasi futbolli ka ndryshuar dhe të gjithë dinë të luajnë. Kam skuadër unike dhe të bashkuar. Përparësinë e shoh te grupi i lojtarëve dhe atmosfera brilante në skuadër, por edhe puna në fazën përgatitore na ka ndihmuar mirë. Me këta djem bëmë historinë e Llapit dhe me të njëjtit po e shkruaj historinë në arenën ndërkombëtare”, ka thënë Batatina të mërkurën për KOHËN.
Llapi në fakt, daljen në Evropë e ka pasur synim të kamotshëm, ndërsa ia doli ta realizojë falë suksesit në Kupë. E fitoi Dukagjinin në finale të Kupës. Për Evropë, Llapi ka bërë disa përforcime, kurse ka larguar edhe disa lojtarë. Batatina insiston se nuk do të kënaqet vetëm me pjesëmarrje në Evropë.
“Nuk më kënaq tash vetëm pjesëmarrja. Dua kualifikimin tutje, dua t’i tregoj vlerat e mia si trajner me skuadra jashtë Kosovës dhe pres nga futbollistët të angazhohen maksimalisht, sepse tash e prezantojmë edhe shtetin e Kosovës. Është ndjenjë e veçantë për mua që nga lufta në male tash ta prezantoj Kosovën në arenën ndërkombëtare në sport, në veçanti në futboll”, është shprehur Batatina.
Ndërkohë, trajneri i Shkupit, Goce Sedlloski thotë se nuk do ta nënvlerësojë Llapin.
“Nuk e nënvlerësojmë kundërshtarin, përkundrazi do të futemi në lojë ta japim maksimumin dhe të sigurojmë rezultat të favorshëm për ndeshjen e kthimit”, tha ai.
Kapiteni i Shkupit, Kristijan Naumovski tha se e sheh Llapin si kundërshtar tejet të papërshtatshëm.
“Të jem i sinqertë nuk mund të them se sa janë kualitativë. Po, jemi favorit në letër, por kjo duhet të tregohet në fushë. Nëse do të luanim kundër ekipeve kosovare para katër apo pesë vjetësh, do të thosha se do t’i kalonim me siguri”, u shpreh Naumoski.
Të enjten pjesëmarrjen në Evropë për herë të parë do ta bëjë edhe skuadra tjetër shqiptare e Maqedonisë së Veriut, Struga. Prej orës 16:00 luan ndaj Liepajës së Lituanisë në Ligën e Konferencës. Në këtë nivel garash Partizani i Tiranës prej orës 20:00 e pret St. Gheorghen të Moldavisë, derisa Vllaznia e Shkodrës përballet me Shiroki Brijegun e Bosnjës. Ndeshjet kthyese do të luhen pas një jave. Të martën, Prishtina luajti me Ferencvaroshin në raundin e parë kualifikues të Ligës së Kampionëve. Humbi ndeshjen e parë 3:0, ndërsa të kthimit e luan më 13 korrik në Prishtinë. Në rast të eliminimit, Prishtina do ta vazhdojë paraqitjen në Evropë, përkatësisht në raundin e dytë të Ligës së Konferencës.
© KOHA. Të gjitha të drejtat janë të rezervuara.
