Tifozët e flaktë të futbollit janë të bindur që të kënduarit, britmat dhe brohoritjet e tyre mund ta çojnë ekipin e zemrës drejt fitores. Dhe ata mund të kenë të drejtë, të paktën në Amerikën e Jugut, ku klubet vendëse po fitojnë më pak në stadiumet e zbrazura nga pandemia.
Gjatë pandemisë përparësia e lojës në shtëpi duket se ka humbur. Në Brazil, Argjentinë e Uruguai, skuadrat këtë edicion kanë humbur më shumë ndeshje si nikoqirë, krahasuar me tri edicionet e kaluara.
Në Brazil, shtetin që jeton dhe merr frymë me futbollin, klubet elitare fituan 202 herë në shtëpi në vitin 2018, me 110 barazime dhe 68 humbje. Në vitin 2019, nikoqirët fituan 184 ndeshje, me 98 barazime dhe 98 humbje. Në vitin 2020, duke luajtur në tribuna të zbrazëta në një sezon ndryshe nga çdo tjetër, skuadrat vendëse fituan më pak në shtëpi, 171 herë. Vendësit barazuan 108 herë dhe humbën 101 ndeshje.
Flamengo, ekip që sapo fitoi titullin e dytë rresht në Brazil, nuk ka dominuar aspak në shtëpi. Ekipi ndeshjet si vendës i luan në tempullin e futbollit, stadiumin “Maracana” të Rios, ku fitoi 32 pikë nga 57 të mundshme sezonin e fundit. Kjo ishte 77 për qind më pak se në vitin 2018 dhe 93 për qind më pak se në vitin 2019.
Sipas Edwin Herazos, kjo rënie e ekipeve në shtëpi nuk është rastësi. Ai është i bindur se mungesa e tifozëve po ndikon dukshëm në paraqitje.
“Është shumë e mundshme që mungesa e mbështetjes psikologjike nga publiku prej tribunave, ndikon shumë në motivimin e lojtarëve”, tha Herazo, kreu i një instituti të analizave sportive në Kolumbi.
Në Argjentinë tribunat shpesh ishin të mbushura me tifozë që shfaqnin pasion të vërtetë, shurdhues për rivalët. Është e veçantë atmosfera që krijohet në stadiumin “Bombonera” të Boca Juniorsit. Mirëpo, ndikimi i stadiumit duket se ka humbur në këtë kohë pandemie. Në vitin 2018, klubet e kampionatit argjentinas fituan 44.4 për qind të ndeshjeve në shtëpi. Në vitin 2019, shifra ishte 43.4 për qind. Ndërsa në vitin 2020 ra në 42.4 për qind.
Në Uruguai, ku familje të tëra shpesh dynden në stadium për të brohoritur për Penarolin ose Nacionalin, klubet fituan 44.8 për qind të ndeshjeve të tyre në shtëpi gjatë sezonit të rregullt në vitin 2019. Në vitin 2018 fituan 39.9 për qind të ndeshjeve. Këtë sezon shifra ka rënë në 36.2 për qind.
Ish-sulmuesi i Bayern Munichut, Atletico Madridit dhe Përfaqësueses së Kolumbisë, Adolfo Valencia, tha se ai merrte një ngarkesë të brendshme të energjisë sa herë që dilte në fushë në një stadium që pulsonte me brohoritjet e tifozëve.
“Unë isha një nga ata lojtarë që e doja atë energji. Sa më e madhe turma, aq më mirë luaja”, tha ai.
“Por ka disa lojtarë që tremben kur shohin një stadium të mbushur plot. Presioni, ulërima e turmës. E gjithë kjo ka një ndikim të madh”.
Gustavo Andrada Bandeira, autori i një libri mbi tifozët e Brazilit, pajtohet me këtë.
“Ekipi vendës motivohet menjëherë dhe kundërshtarët sulmohen menjëherë nga tifozët kur dalin në fushë. Të gjithë tifozët e futbollit janë absolutisht të sigurt se ndikojnë në rezultatin e ndeshjes. Tani ata mund të thonë se kanë të drejtë. Ata janë të vetmit në gjendje të transformojnë ekipin kur luan në shtëpi. Statistikat e konfirmojnë këtë”.
Ligat e ndryshme janë përpjekur të mbushin boshllëkun e tribunave të zbrazëta me regjistrime të brohoritjeve të tifozëve, flamuj të mëdhenj dhe madje prerje kartoni të tifozëve. Përpjekjet kryesisht kanë rënë poshtë, sepse nuk ka pasur rezultat. Edhe sulmuesi i Evertonit, braziliani Richarlison, thotë se derisa luante në tribuna boshe nuk kishte asnjë efekt tentimi për motivim.
“Mungesa e tifozëve mund të bëjë që ekipi mysafir të ndihet më i qetë për shkak se nuk përballet me presionin e tyre”, insistoi Richarlison.
Në Angli, ku ai luan, tendenca duket e ngjashme me atë të Amerikës së Jugut. Në këtë pikë të sezonit, ku janë luajtur 26 xhiro, klubet kishin fituar 89 ndeshje në udhëtim në vitin 2018 dhe 83 në vitin 2019.
Ndërsa këtë sezon shifra është 101 fitore në udhëtim. Trajneri i Leedsit, Marcelo Bielsa nga Argjentina, e përmblodhi ndryshimin.
“Do të ishte një padrejtësi për tifozët të mos e vlerësojnë atë që ata përfaqësojnë për secilin klub të vetëm”, tha ai.
© KOHA. Të gjitha të drejtat janë të rezervuara.
