Marrëveshja është firmosur ndërmjet federatave, ekipet pjesëmarrëse janë caktuar, arbitrat e kanë mbajtur seminarin, por megjithatë Liga Unike në basketboll nuk po fillon. Është shorti ai që po e mban pezull fillimin e ligës së përbashkët të ekipeve të Kosovës e Shqipërisë.
Marrëveshja është firmosur ndërmjet federatave, ekipet pjesëmarrëse janë caktuar, arbitrat e kanë mbajtur seminarin, por megjithatë Liga Unike në basketboll nuk po fillon. Është shorti ai që po e mban pezull fillimin e ligës së përbashkët të ekipeve të Kosovës e Shqipërisë.
Tërheqja e shortit për Ligën Unike, që është paralajmëruar të nisë këtë muaj, ende nuk është bërë për shkak të vendimit të Qeverisë së Shqipërisë që ndalon aktivitetet sportive në palestra. Në Federatën e Basketbollit të Kosovës (FBK) kanë thënë se gjithçka është gati për fillimin e Ligës Unike dhe se po presin vetëm lejen e Qeverisë shqiptare për hapjen e palestrave, gjë që ende nuk kanë ndodhur.
Ndërkohë në Federatën Shqiptare të Basketbollit (FSHB) kanë thënë se janë në pritje të dritës së gjelbër që nuk dihet se kur mund të vijë për shkak të situatës aktuale me pandeminë e koronavirusit. Për shkak të kësaj situate të krijuar, në FBK kanë paralajmëruar se mund të shtyhet fillimi i Ligës Unike. Është e qartë se shorti nuk mund të tërhiqet pa u hapur palestrat në Shqipëri. Bazuar në këtë, gjasat janë të mëdha që Liga Unike të mos startojë deri në muajin e ardhshëm. Edicioni i fundit në Shqipëri është ndërprerë ashtu siç ndodhi edhe në Kosovë, pas shpërthimit të koronavirusit. Muajin e shkuar të dy federatat e firmosën Marrëveshjen për Ligën Unike në Tiranë, hap që u përgëzua nga të gjithë. Marrëveshja ishte firmosur me pompozitet, por në praktikë gjërat po hasin në vështirësi, sidomos në Shqipëri.
“Ne e kemi paraparë një gjë të tillë, që nëse nuk lejohen aktivitetet e basketbollit në Shqipëri sipas kalendarit të paraparë, atëherë të shtyjmë fillimin e Ligës Unike për një kohë të caktuar. Mund të shtyhet për një javë pasi po shpresojmë që në Shqipëri të jepet leja sa më shpejt për hapjen e palestrave të basketbollit. Ideja ka qenë që Liga Unike të nisë menjëherë pas Superligës, që do të startojë më 28 tetor”, është shprehur sekretarja e përgjithshme e FBK-së, Elvira Dushku, të hënën, për KOHËN. “Liga Unike është gati, vetëm po presim lejimin e aktiviteteve të basketbollit në Shqipëri. Pra, shorti është pezull për shkak se ende nuk po hapen palestrat. Në momentin që do të merret vendimi, atëherë gjithçka do të përfundojë shumë lehtë për shkak se shorti është diçka që përfundon shumë shpejt”. Në FSHB kanë treguar se ende nuk ka ndryshuar situata në lidhje me vendimin e Qeverisë shqiptare për mbylljen e palestrave. Ky vendim mbetet ende në fuqi me gjithë kërkesat e Federatës shqiptare që të lejohen aktivitetet e basketbollit sikurse në gjithë Evropën.
Artikullin e plotë mund ta lexoni në gazetën Koha Ditore. Klikoni këtu për t’u regjistruar falas.
© KOHA. Të gjitha të drejtat janë të rezervuara.
