Arrestohen liderë të tifozëve të Juves për shantazh ndaj klubit

Arrestohen liderë të tifozëve të Juves për shantazh ndaj klubit

16 September 2019 22:45

Policia ka arrestuar 12 liderë të ultrasve të Juventusit të hënën për një numër të akuzave, përfshirë edhe kërkesën ilegale për të marrë më tepër bileta për ndeshje.

Policia ka njoftuar se tifozët kishin kërcënuar për të vazhduar me thirrje raciste gjatë ndeshjeve nëse nuk u jepen më tepër bileta sesa numrin e zakonshëm që kanë.

Hetimi i prokurorëve të Torinos është lidhur me infiltrimin e mafisë kalabreze 'ndrangheta" në sektorin e "ultrasve" në "Allianz Stadium" të Juventusit.

Tridhjetë e shtatë persona janë nën hetime.

Në mesin e akuzave përfshihen lidhja kriminale, zhvatja, pastrimi i parave dhe dhuna.

Në mesin e materialeve të konfiskuara nga tifozët janë panot, ku gjenden simbole naziste e fashiste dhe portrete të Benito Mussolinit, diktatorit fashist italian.

I arrestuar është edhe Dino Mocciola, kreu i grupit të tifozëve "Drughi". Ai kishte vuajtur burgun në vitet ’90, pasi kishte vrarë një polic paramilitar gjatë një plaçkitjeje.

"Drughi ishte një organizatë e tipit ushtarak. Njerëzit janë sulmuar nëse nuk u janë përgjigjur instruksioneve të liderit Dino Mocciola. Këta janë njerëz që bëjnë dhunën stil të jetës. Përkrahja e një skuadre futbolli është pretekst. Madje as prezenca e fëmijëve nuk i ka ndalur ata", ka thënë prokurorja Patrizia Caputo.

Hetimet janë iniciuar nga një akuzë e ngritur nga Juventusi një vit më parë. Arrestimet kanë ardhur dy vjet pasi klubi është gjobitur dhe është detyruar të luajë një ndeshje me një pjesë të tribunave të zbrazura për shkak të shitjes së biletave te "ultrasit" dhe inkurajimin e tregut të zi të biletave.

Presidenti i Juventusit, Andrea Agnelli po ashtu ishte gjobitur për shitje të biletave tek ultrasit, por suspendimi i tij njëvjeçar ishte anuluar nga gjykata e apelit e Federatës së Futbollit të Italisë në dhjetor të vitit 2017.

"Juventusi ishte palë e dëmtuar. Ka punuar me policinë shtetërore nga fillimi dhe ka raportuar te DIGOS (Divizioni i Operacioneve Speciale të Policisë). Ishte e mundur të sigurohet ky rezultat falë bashkëpunimit me Juventusin", ka thënë kreu i DIGOS-it të Torinos, Carlo Ambra.

© KOHA. Të gjitha të drejtat janë të rezervuara.

Komentet

Shto koment

Të ngjashme