Dita e fundit e afatit kalimtar: Ajeti është i West Hamit

Dita e fundit e afatit kalimtar: Iwobi zyrtarizohet tek Evertoni

08 August 2019 10:11
22:21

Alex Iwobi është zyrtarisht lojtar i Evertonit.

Ai u largua nga Arsenali në ditën e fundit të afatit kalimtar dhe ka nënshkruar kontratë pesëvjeçare me klubin e ri.

23-vjeçari ka pasur 149 ndeshje për “Topçinjtë” dhe ka kontribuar me 15 gola.

21:16

Dita e fundit e afatit kalimtar: Shabani kalon te Wolvesi

Image

Mesfushori kosovar, Meritan Shabani është zyrtarizuar te Wolverhampton Wanderersi.

Ai ka nënshkruar kontratë trevjeçare pas largimit nga Bayerni.

Mesfushori ofensiv 20-vjeçar ka thënë se është tejet i lumtur që ka kaluar në Premier Ligë.

“Jam i lumtur që kam kaluar më në fund te Wolvesi, projekti këtu është një që më ka gëzuar dhe jam falënderues që kam shansin të dëshmoj veten”, ka thënë ai.

21:09

Dita e fundit e afatit kalimtar: Arsenali transferon David Luizin

Arsenali ka konfirmuar transferimin e mbrojtësit David Luiz nga Chelsea.

32-vjeçari ka nënshkruar kontratë dyvjeçare me “Topçinjtë”.

Tek Arsenali ai do të bartë fanellën me numrin 23.

20:04

Dita e fundit e afatit kalimtar: Leicesteri transferon Praetin

Leicesteri ka kompletuar transferimin e mesfushorit Dennis Praet nga Sampdoria.

Mesfushori ofensiv ka nënshkruar kontratë pesëvjeçare me klubin e ri.

Në 107 paraqitje për klubin italian, Praet kishte realizuar katër gola.

18:59

Dita e fundit e afatit kalimtar: Tottenhami transferon Sessegnonin

Image

Tottenhami ka konfirmuar transferimin e futbollistit që luan në krahun e majtë, Ryan Sessegnon.

19-vjeçari ka nënshkruar kontratë që e mban te Tottenhami deri më 2025. Ai ka marrë fanellën me numrin 19.

Transferimi i tij nga Fulhami, Tottenhamit i kushtoi rreth 30 milionë euro.

18:52

Dita e fundit e afatit kalimtar: Burnley huazon Drinkwaterin

Image

Burnley ka kompletuar transferimin e mesfushorit Danny Drinkwater nga Chelsea.

29-vjeçari është huazuar deri në janar.

Lojtari kishte kaluar te Chelsea në vitin 2017 pas largimit nga Leicesteri.

18:26

Dita e fundit e afatit kalimtar: Tottenhami konfirmon Lo Celson

Image

Tottenhami ka konfirmuar transferimin e mesfushorit Giovani Lo Celso nga Real Betisi.

23-vjeçari ka kaluar në Londër në formë huazimi për një sezon.

Klubi ka mundësinë e transferimit të tij verën e ardhshme për rreth 60 milionë euro.

18:13

Dita e fundit e afatit kalimtar: City huazon portierin Carson

Image

Manchester City ka transferuar në formë huazimi portierin Scott Carson nga Derby County.

33-vjeçari është opsion shtesë krahas Edersonit dhe Claudio Bravos, pas huazimit të Arijanet Muriqit te Nottinghami.

Ai është huazuar për një sezon.

18:08

Dita e fundit e afatit kalimtar: Caroll rikthehet te Newcastle

Image

Newcastle United ka kthyer në skuadër sulmuesin Andy Caroll.

30-vjeçari u kthye në St. James’ Park tetë vjet e gjysmë që kur u largua.

Ai ka nënshkruar kontratë njëvjeçare.

18:02

Mbyllet afati kalimtar në Premier Ligë

Ka përfunduar orari i caktuar për afatin kalimtar në Premier Ligë.

Tani klubet angleze vetëm mund të prezantojnë transferimet të cilat i kanë kompletuar para orës 18:00, sipas kohës sonë lokale.

Sipas raportimeve, janë disa transferime që pritet të prezantohen.

17:53

Dita e fundit e afatit kalimtar: Arsenali kompleton transferimin e Tierneyt

Image

Arsenali ka kompletuar transferimin e mbrojtësit Kieran Tierney nga Celticu.

22-vjeçari ka marrë fanellën me numrin 3 tek Arsenali.

Ai ka nënshkruar kontratë pesëvjeçare.

 

17:16

Dita e fundit e afatit kalimtar: Watfordi bën transferimin rekord të klubit

Watfordi ka njoftuar se ka kompletuar transferimin rekord të senegalezit Ismaila Sarr nga Rennesi në Francë.

Anësori 21-vjeçar ka nënshkruar kontratë pesëvjeçare me klubin anglez.

Në dy vjet në Francë ai ka shënuar 18 gola në 77 paraqitje.

Te Watfordi do të bartë fanellën me numrin 23.

17:07

Një orë deri në mbyllje të afatit kalimtar në Premier Ligë

Kanë mbetur më pak se 60 minuta deri në mbyllje të afatit kalimtar të verës në Premier Ligë.

Këto janë zhvillimet më të mëdha të ditës së sotme:

Albian Ajeti u zyrtarizua te West Hami

Meritan Shabani afër Wolverhamptonit

Paulo Dybala nuk kalon te Tottenhami

Interi transferon Lukakun

Arsenali afër kompletimit të transferimit të David Luizit dhe Kieran Tierneyt

Zaha nuk lëviz nga Crystali

Tottenhami arrin marrëveshje për Sessegnonin

Evertoni e do Rojon

Afati kalimtar i transferimeve në Premier Ligë mbyllet në orën 18:00 sipas kohës sonë lokale.

17:02

Dita e fundit e afatit kalimtar: Nketiah huazohet te Leedsi

Arsenali ka huazuar sulmuesin Eddie Nkhetiah te Leeds United.

20-vjeçari ka kaluar te Leedsi në formë huazimi për një sezon.

Ai debutoi për “Topçinjtë” në shtator të 2017-s. Sezonin e shkuar pati nëntë paraqitje në të gjitha garat për Arsenalin.

16:52

Dita e fundit e afatit kalimtar: Lukaku kompleton transferimin tek Interi

Image

Interi ka kompletuar transferimin e sulmuesit Romelu Lukaku nga Manchester Unitedi.

Klubi italian ka publikuar një video të lojtarit ku ai thotë se “Interi s’është për këdo, andaj jam këtu”.

16:32

Dita e fundit e afatit kalimtar: Zahas nuk i plotësohet dëshira, mbetet te Crystali

Image

Anësori i Crystal Palacet, Wilfried Zaha, do të qëndrojë edhe këtë sezon te ky klub.

Sipas “SkySports”, Crystali i ka bërë të ditur lojtarit se ka marrë fund çdo transferim i mundshëm në orën e fundit të afatit kalimtar.

Zaha kishte kërkuar nga klubi që ta shiste, por Crystali refuzoi disa oferta deri në 70 milionë euro, duke kërkuar edhe më shumë për reprezentuesin e Bregut të Fildishtë.

15:34

Dita e fundit e afatit kalimtar: Meritan Shabani për teste mjekësore te Wolvesi

Image

Mesfushori shqiptar, Meritan Shabani është duke kryer testet mjekësore te Wolvesi, raporton Sky Sports News.

Sipas këtyre raportimeve thuhet se tashmë klubi anglez ka arritur marrëveshje me Bayernin për shërbimet e 20 vjeçarit, transmeton Koha.net.

Përveç Shabanit, klubi anglez do të përforcohet edhe me sulmuesin e Readingut, Danny Loader, që gjithashtu është duke i kryer testet mjekësore.

14:10

Dita e fundit e afatit kalimtar: Tierney po kryen testet mjekësore tek Arsenali

Image

Kieran Tierney është duke iu nënshtruar testeve mjekësore para se të kompletojë transferimin tek Arsenali, raporton Sky Sports.

Arsenali e Celticu kishin arritur marrëveshje mbrëmë përreth 27 milionë euro, transmeton Koha.net.

Tierney pritet që së shpejti të zyrtarizohet tek Arsenali.

13:45

Dita e fundit e afatit kalimtar: Danny Rose drejt largimit nga Tottenhami

Image

Danny Rose pritet që të largohet nga Tottenhami në ditën e fundit të afatit kalimtar të Premier Ligës.

Për shërbimet e tij ka shprehur interesim Watfordi, transmeton Koha.net.

Mbrojtësi i krahut të majtë nuk është më në planet e Mauricio Pochettinos, derisa është lënë jashtë skuadrës për ndeshjet parasezonale.

13:36

Dita e fundit e afatit kalimtar: Evertoni kërkon Rojon

Image

Evertoni është duke biseduar për transferimin e mbrojtësit të Manchester Unitedit, Marcos Rojo, raporton Sky Sports News.

Pas dështimit për ta transferuar Chris Smallingun, Evertoni synon ta blejë kartonin e Rojos, transmeton Koha.net.

Kujtojmë se Evertoni kishte tentuar ta transferonte argjentinasin edhe në verën e kaluar.

13:14

Dita e fundit e afatit kalimtar: Wolvesi arrin marrëveshje me Milanin për Kessien

Image

Wolverhampton Wanderers raportohet se ka arritur marrëveshje me Milanin për shërbimet e mesfushorit Franck Kessie.

Sportitalia raporton se klubi anglez do t’ia paguajë 25 milionë euro Milanit dhe 3 milionë euro të tjera bonuse për shërbimet e Kessiet, transmeton Koha.net.

Kessie tashmë është duke negociuar kushtet personale me klubin anglez.

13:08

Dita e fundit e afatit kalimtar: Juve bllokon transferimin e Dybalas te Tottenhami

Image

Juventusi nuk do ta lejojë transferimin e Paulo Dybalas te Tottenhami pas pasur një zëvendësues të tij, raporton Sky Sport Italia.

“Zonja e Vjetër” ka humbur garën nga Interi për shërbimet e Romelu Lukakus, dhe tani po e mendon shkëmbimin Dybala – Icardi, transmeton Koha.net.

Mediat në Itali raportojnë se edhe Interi është i gatshëm që të shkëmbejë Mauro Icardin me Dybalan, pasi më Conte nuk llogarit në shërbimet e sulmuesit argjentinas.

E për shkak të marrëveshjes shumë të komplikuar dhe kohës së shkurtë mediat britanike raportojnë se edhe Tottenhami është dorëzuar për Dybalan.

12:55

Dita e fundit e afatit kalimtar: Ryan Sessegnon afër Tottenhamit

Raportohet se Tottenhami ka siguruar shërbimet e yllit të Fulhamit, Ryan Sessegnon, kur kanë mbetur edhe pak orë deri në mbylljen e afatit kalimtar në Premier Ligë.

Goal raporton se Tottenhami ka paguar 27 milionë euro për shërbimet e tij, transmeton Koha.net.

Në marrëveshje është përfshirë edhe Josh Onomah, i cili do të bashkohet me Fulhamin.

Sessegnon ishte ai që e ka shtyrë këtë marrëveshje drejt finalizimit, kur dihet se ai ka vetëm edhe një vit kontratë me Fulhamin.

12:16

Dita e fundit e afatit kalimtar: Luizi drejt Arsenalit, arrihet marrëveshja

Sot është dita e fundit e afatit kalimtar për klubet e Premier Ligës.


Mediat britanike raportojnë se David Luiz do të transferohet tek Arsenali, pasi është arritur marrëveshja ndërmjet klubeve.

Arsenali raportohet se ia ka paguar Chelseat 8.6 milionë euro për mbrojtësin 32 vjeçar, transmeton Koha.net.

Ylli brazilian do të nënshkruajë kontratë dy vjeçare me Arsenalin.

11:10

Dita e fundit e afatit kalimtar: Lukaku mbërrin në Itali për teste mjekësore tek Interi

Sulmuesi belg, Romelu Lukaku pritet të bashkohet me Interin në këtë afat kalimtar. 

Ylli i Unitedit ka mbërritur në Itali për të kryer testet mjekësore, derisa është pritur nga dhjetëra fansa të Interit, transmeton Koha.net. 

Për shërbimet e tij Interi ka paguar rreth 80 milionë euro, derisa Lukaku do të marrë pagë prej 9 milionë euro në sezon. 

Lukaku pritet të nënshkruajë kontratë deri më 2024 me Interin.

10:50

Dita e fundit e afatit kalimtar: Dybala arrin marrëveshje me Tottenhamin

Image

Tottenhami është shumë afër transferimit të yllit argjentinas, Paulo Dybala nga Juventusi.

Mediat britanike raportojnë se tashmë Dybala është pajtuar për kushtet personale me Tottenhamin, transmeton Koha.net.

E vetmja pikë në të cilën është duke ngecur momentalisht për t’u arritur marrëveshja finale është ajo për të drejtat e imazhit të lojtarit, të cilat janë në pronësi të kompanisë nga Malta “Star Image” për të cilën Tottenhami duhet të paguajë një shumë të caktuar.

10:20

Dita e fundit e afatit kalimtar: Meritan Shabani pranë klubit anglez

Image

Sot është dita e fundit e afatit kalimtar për klubet e Premier Ligës.

Mesfushori shqiptar Meritan Shabani është shumë afër transferimit te klubi anglez, Wolves, raporton Sky Sports.

Sipas këtyre raportimeve thuhet se Wolvesi është afër të kompletojë transferimin e 20 vjeçarit nga Bayerni, transmeton Koha.nt.

Shabani momentalisht gjendet në Britani për të finalizuar marrëveshjen personale me klubin anglez, pasi ajo ndërmjet dy klubeve është arritur.

Ai me këtë rast do të kryejë edhe testet mjekësore para zyrtarizimit te Wolvesi.

Mesfushori sulmues ka vetëm edhe një vit kontratë me Bayernin, derisa pritet që menjëherë të bashkohet me ekipin U23 të Wolvesit.

10:11

Dita e fundit e afatit kalimtar: Ajeti është i West Hamit

Image

Sot është dita e fundit e afatit kalimtar për klubet e Premier Ligës.

West Hami është përforcuar me sulmuesin shqiptar Albian Ajeti.

Ajeti ka nënshkruar kontratë katër vjeçare me “Çekanët”, që i kanë paguar Baselit 8.7 milionë euro për shërbimet e sulmuesit shqiptar.

© KOHA. Të gjitha të drejtat janë të rezervuara.

Komentet

Shto koment

Të ngjashme