Trepça 89 nuk ka arritur t’i bëjë ballë sulmeve të kampionit të Kosovës, Feronikelit, duke u mposhtur kështu me rezultat të thellë prej 5-1 në finalen e Kupës së Kosovës.

Feronikeli serinë e golave e nisi qysh në pjesën e parë, gjegjësisht në minutën 16-të përmes Astrit Fazliut. 11 minuta më pas, Mendurim Hoti realizoi për të dyfishuar epërsinë, rezultat me të cilin edhe përfundoi pjesa e parë.

Në fillim të pjesës së dytë, kampioni i Kosovës, Feronikeli u pa se s’donte ta lëshonte kupën nga duart, dhe kështu erdhi edhe goli i tretë në minutën e 67-të përmes Albutrint Morinës.

Vetëm 3 minuta më pas, Kastriot Rexha shënoi për të katërfishuar epërsinë e skuadrës së tij ndaj një Trepçe që s’ishte fare në nivelin e kundërshtarit.

Por, në minutën e 73-të, vendësit arrijnë të shënojnë golin e vetëm në këtë ndeshje përmes Ardian Mujës, duke bërë që rezultati të ngushtohej në 4-1.

Dhe, kur të gjithë menduan se ky edhe do të ishte rezultati final i ndeshjes, në skenë doli sërish Rexha i Feronikelit për të realizuar golin e dytë të tij personal dhe të pestin për skuadrën e tij në minutën e 89-të të takimit.

Me këtë rezultat edhe u mbyll kjo ‘ëndërr e keqe’ e Trepçës 89.

Trepça 89 shënon për rezultatin 4-1

Tre minuta pasi u ndëshkua edhe me golin e katërt, skuadra vendëse e kësaj ndeshjeje, Trepça 89, ka arritur që të shënojë gol kundër Feronikelit përmes Ardian Mujës ('73), duke ngushtuar epërsinë në 4-1.

Feronikeli realizon për herë të katërt

Skuadra e Feronikelit ka shënuar edhe golin e 4-të në ndeshje në minutën e 70-të, kësaj radhe përmes Kastriot Rexhës, duke ia shuar kështu gjasat pothuajse përfundimisht Trepçës 89 që të prek Evropën. 

Nikli shënon edhe golin e tretë

Skuadra fituese e Superligës së Kosovës, Feronikeli, ka shënuar edhe golin e tretë në minutën e 67-të përmes Albutrint Morinës.

Pjesa e parë mbyllet me rezultatin 2-0 për Feronikelin

Kastriot Rexha i Feronikelit, në sekondat e fundit të ndeshjes, për pak sa nuk shënoi për rezultatin 3 me 0 ndaj Trepçës 89.

Skuadrat shkuan në pushimin 15 minutësh me rezultatin 2-0 në të mirë të Feronikelit.

Feronikeli dyfishon epërsinë

Në minutën e 27-të, Mendurim Hoti dyfishon epërsinë ndaj Trepçës 89.

Feronikeli kalon në epërsi

Ka shënuar Astrit Fazliu i Feronikelit për rezultatin 0-1 ndaj Trepçës 89.

Trofeu i cili i çon skuadrat kosovare në Evropë, është duke u zhvilluar në stadiumin e Prishtinës “Fadil Vokrri” mes fituesit të Superligës, Feronikelit dhe Trepçës 89.

Fituesi i Kupës siguron paraqitjen në kualifikimet e Ligës së Evropës, që sjell benefite të shumta.

Ndonëse Feronikeli tashmë e ka siguruar Champions Ligën, Trepça 89 do të luftojë që ta fitojë ndeshjen në mënyrë që të paraqitet në garat evropiane.

Feronikeli të dielën festoi titullin, duke fituar 2:0 ndeshjen vendimtare ndaj Prishtinës. Trepça '89 të dielën fitoi 4:0 ndaj KEK-ut, por ishte kjo një fitore e vonshme që “xehetarët” nuk i largoi nga zona e barazhit, në të cilën ranë papritur pak xhiro para fundit.

Trepçën '89 pas finales së Kupës e pret ndeshja vendimtare për mbetje në elitë, ajo e barazhit ndaj Vëllaznimit. ‘89-shi ka mbyllur edicionin në pozitën e nëntë në Superligë.