Feronikeli dhe Prishtina, gati për “finalen” e nesërme

Faton Polisi Faton Polisi 18 May 2019 19:14

Feronikeli dhe Prishtina, të shtunën i kanë zhvilluar stërvitjet e fundit para finales së madhe që vendos për titull të kampionit në IPKO Superligën e Kosovës në futboll.

Skuadra nga Drenasi është stërvitur me dyer të hapura, derisa ajo e Prishtinës ishte e mbyllur dy ditët e fundit për media dhe shikues, raporton KTV.

Trajneri i Feronikelit, Zekirija Ramadani, të dielën pret nga futbollistët e tij maksimumin për ta fituar ndeshjen ndaj Prishtinës, ndonëse i duhet vetëm një pikë për t’u shpallur kampion.

Për herë të fundit, Feronikeli e fitoi titullin në vitin 2015, kurse Prishtina në vitin 2013.

Në rast se triumfon Feronikeli, do të ishte titulli i tretë, kurse për Prishtinën i teti i pasluftës.

“Ne edhe pse e konsiderojmë ndeshje të radhës, natyrisht se kjo ndeshje e ka rëndësinë e vetë. Mirëpo, për ne lojtarëve, stafin dhe publikun tonë është më rëndësi që t’i qasemi me shumë qetësi kësaj ndeshjeje, sepse e dimë që edhe kundërshtari ka kualitete në radhët e vet”, ka thënë Armend Dallku, kapiten i FC Prishtinës.

Ndeshja ndërmjet Feronikelit dhe Prishtinës zhvillohet të dielën, nga ora 16:00, në stadiumin “Rexhep Rexhepi” në Drenas.

© KOHA. Të gjitha të drejtat janë të rezervuara.

Komentet

Shto koment

Të ngjashme