SOT

Malet e Kamenicës të mbushura me kërpudha

Malet e Kamenicës janë të mbushura me kërpudha. Shumë prej tyre janë të shëndetshme.

Janë të shumtë banorët që mbledhin kërpudha deri në 10 tonë në ditë.

Ata i dërgojnë në atë që Fatmir Krasniqi e ka kthyer në biznes.

Krasniqi i grumbullon nga banorët 6 lloje të kërpudhave, ndër to edhe tartufin, llojin e veçantë e më të shtrenjtë në treg.

“Në kompaninë tonë fungo grumbullohen, përpunohen dhe eksportohen 6 lloje të kërpudhave. Kërpudha shampinjon kultivohet dhe e mbulon tregun vendor, ndërsa kërpudhat e malit, siç janë: buledosodulisi, shantarelli, amanita cesarea, morçella konika, trumpeta e zezë, si dhe tartufi, e cila e ka vlerën e vet dhe është shumë vështirë për të hasur në të. Vlera e tartufit të bardhë është shumë më e madhe sesa e tartufit të zi. Kilogrami i tartufit arrin nga 800 euro deri në 1.200 euro”, ka deklaruar Fatmir Krasniqi, fermer.

Nga Kamenica kërpudhat eksportohen tashmë në shtetet evropiane, derisa kërkesat kanë ardhur edhe përtej oqeanit.

“Asnjëherë nuk janë çmimet e njëjta, kërpudhat e malit variojnë shumë. Kohë më parë kilogrami i tyre ka qenë 10 euro, ndërsa tani, kur kemi më shumë kërpudha, kilogrami i tyre është mbi 1 euro. Brenda vitit ne grumbullojmë mbi 1 mijë tonë ose 1 milion kilogramë. Nga eksporti marrim mbi 1 milion euro, ndërsa në tregun vendor grumbullojmë rreth 200 tonë në vit”, tha ai.

Sikurse pranvera ashtu edhe muajt e vjeshtës për shkak të reshjeve mbushin malet me kërpudha.

“Sezoni e kërpudhave të malit është maj-qershor dhe shtator-tetor. Këto ditë ka pasur reshje të mëdha të shiut dhe pas tij e dimë që dalin kërpudhat. Fuqia e natyrës është shumë e madhe dhe çdoherë natyra ju del në ndihmë. Para dy vjetëve në kohë pandemie, kur ka pasur krizë shkaku i ekonomisë, ajo kohë ka qenë e frytshme për kërpudha pasi ka pasur shumë për të vjelur. Ne kemi arritur deri në 30 tonë kërpudha në ditë me i grumbulluar, edhe në këtë vit ku vendi ynë përballet me një krizë ekonomike, natyra na ka dalë në ndihmë që kemi shumë kërpudha. Nga kjo nuk janë përfitues vetëm punëtorët, por edhe fermerët”, shtoi ai.

Për të pasur kualitet të produkteve, ai thotë se kërpudhave duhet t’u kushtohet kujdes i veçantë që nga grumbullimi e deri te konsumimi.

“Kërpudhat e duan një trajtim zakonisht, duhet të ruhet 2 deri në 4 gradë celsius për me ia zgjatur jetëgjatësinë. Personat që duan me i konsumuar të freskëta nuk duhet t’i pastrojnë nga dheu, sepse janë më të shëndetshme. Edhe me i pastruar me ujë nuk duhet, por vetëm të fshihen nga zalli apo dheu, sepse uji vetëm e dëmton”.

Krasniqi tregon se me ketë punë e ka mbajtur familjen qysh nga vitet ‘90.

“Veprimtarinë me kërpudha e kemi filluar në vitin 1990, por jo në këto kushte që i kemi tani. Fillimi ka qenë shumë i vështirë pasi që kjo ka qenë e vetmja mundësi për mbijetesë në vitet ‘90 që ta mbaj familjen. Shumë persona kanë ikur nga vendi në atë kohë, ndërsa unë si student që isha me kërpudha e mbaja familjen”, pohoi ai.

Përveçqë grumbullon, ai edhe kultivon një lloj të kërpudhave, thotë se është i kënaqur edhe me tregun vendor.

“Pas luftës kam filluar që t’i kultivoj kërpudhat shampinjon vetë, përveç atyre të malit që i mbledhim e i blejmë nga banorët. Arsyeja e kësaj ka qenë që t’i mbaja punëtorët gjatë krejt vitit në punë dhe jo vetëm në punë sezonale”.

E ata që mbledhin kërpudha e dinë që duhet kujdes për shkak se disa lloje të kërpudhave janë të helmueshme dhe madje edhe vdekjeprurëse.