Rektori i Universitetit të Prizrenit, “Ukshin Hoti” Ramë Vataj, e ka punësuar motrën e tij në Komunën e Prizrenit.
Kastriote Vataj do të fillojë punën në Drejtorinë e Administratës në këtë komunë.
Mirëpo, drejtori i kësaj Drejtorie, Ilir Baldedaj, thotë se nuk është në dijeni as për konkursin dhe as për pozitën të cilën do ta mbajë e punësuara.
Madje, ai thotë të mos ketë kërkuar fare punëtorë për ndonjë pozitë.
Ndërkaq, në Universitetin e Prizrenit, thonë se punësimi i motrës së rektorit, është lajm i mirë, raporton KTV.
Krejt kjo, sipas asamblistëve të Vetëvendosjes në Prizren, ka ndodhur pas marrëveshjes mes dy institucioneve.
Artan Abrashi ka thënë se motra e rektorit Vataj, është punësuar pasi Universiteti i Prizrenit, ka përgatitur konkursin i cili do të shpallet në ditët në vazhdim enkas për të vëllanë e shefit të Zyrës së Personelit në komunën e Prizrenit, Isa Gashi.
I kontaktuar nga KTV-ja, shefi i Zyrës së Personelit në Komunën e Prizrenit, Isa Gashi, ka mohuar këto akuza, duke thënë se nuk merret me zyrtarë të partive që nuk i njohin ligjet e Republikës së Kosovës.
