Është bërë i ditur lajmi se aktorja, Samantha Weinstein, ka vdekur në moshën vetëm 28-vjeçare.
Ajo njihej më së miri për rolin në filmin e vitit 2013, “Carrie”, në të cilin rolin kryesor e luajti ylli i Hollywoodit, Chloë Grace Moretz.
Weinstein vdiq më 14 maj, njoftojnë mediat e huaja, në spitalin “Princess Margaret” në Toronto, kjo pasi ishte diagnostikuar me një formë të rrallë të kancerit në vezore.
Pasi luftoi me sëmundjen që nga viti 2021, vdekja e aktores u njoftua në faqen e saj në Instagram nga familja e saj.
“Pas dy vitesh e gjysmë trajtimi për sëmundjen e kancerit dhe një jetë udhëtimi në të gjithë botën, duke huazuar zërin për një mori personazhesh të filmave të animuar, duke bërë muzikë dhe duke kuptuar më shumë për jetën se sa shumica e njerëzve në botë, ajo tani e ka filluar aventurën e saj të radhës”, shkruhej në postimin e familjes Weinstein. Tutje ata bënë të ditur se Samantha dha frymën e fundit në prani të familjarëve të saj të dashur.
Në tetor të vitit të kaluar, aktorja kanadeze u martua me partnerin e saj Michael Knutson dhe vetëm në muajin e kaluar çifti arriti ta realizojë një muaj mjalti të vonuar në Japoni.
© KOHA. Të gjitha të drejtat janë të rezervuara.
