U shfaq premiera londineze e filmit “Avatar: The Way of Water”
Foto: AP/Associated Press
Pothuajse 13 vjet pas lansimit të filmit rekordthyes, “Avatar”, regjiori James Cameron iu bashkua aktorëve yje në premierën botërore të vazhdimit të dytë të projektit të shumëpritur, “Avatar: The Way of Water”.
Sam Worthington, Zoe Saldaña dhe Sigourney Weaver, po ashtu parakaluan mbi qilimin e katër të shtruar në sheshin “Leicester Square” të Londrës, krahas pjesës tjetër të kastës dhe ekipit të filmit.
“Kishte kohë kur nuk mendonim se filmi do të realizohej. Kur u goditëm nga pandemia, xhirimet u pezulluan për gjashtë muaj. Edhe atëherë kur u kthyem në punë, nuk e dinim nëse kinematë do të ekzistonin ende. Më kuptoni çfarë dua të them? Ishin kohë goxha të vështira për ne sepse punën rreth realizimit të projektit e kishim filluar para pesë vjetësh. Por, ja ku jemi tani. Njerëzit po rikthehen para ekranit dhe kinematë janë sërish të mbushura me shikues. Biletat për filmin në javët e para janë shitur tërësisht dhe kjo na bënë të ndihemi mirë. Është një ndjesi ringjallje do të thosha”.
Filmi i ri që zgjatë tri orë e vazhdon historinë e Na’vit, një racë humanoidësh jashtëtokësorë që janë nën sulmin e njerëzve.
Worthington dhe Saldaña i përsërisin rolet e tyre si, Jake Sully dhe Neytiri, të cilët tani detyrohen të kërkojnë strehim tek klani Metkayina, që banon në shkëmbinj nënujorë.
“Ne nuk e kemi bërë një kopje të filmit të parë. Në fakt dëshironim të përparonim, jo vetëm nga ana e teknologjisë por edhe në aspektin e kësaj bote të imagjinuar. Në filmin e dytë keni mundësi të shihni më shumë nga Pandora dhe historia që trajtohet është zhvilluar, duke u fokusuar në këtë familje dhe përpjekjet e kryepersonazheve për ta mbrojtur atë”.
Cameron e ka angazhuar aktoren britanike Kate Winslet në rolin e Ronal, duke e shënuar kështu bashkëpunimin e tyre të parë nga filmi “Titanic”, i cili e shndërroi aktoren në një yll të kinematografisë në vitin 1997.
Winslet e përshkroi filmin e ri, “The Way of Water”, si një eksperiencë të jashtëzakonshme.
“Thjeshtë ishte mahnitëse. Gjithçka rreth kësaj eksperience, duke filluar nga rolet që regjisori i ka krijuar, veçanërisht ato për gratë. Ai krijon role të cilat jo vetëm se janë të fuqishme, por në fakt sjell në ekran gra liderë dhe shumë të guximshme. Të gjitha personazhet në filmat e Cameronit janë njerëz që marrin përgjegjësi dhe e jetojnë jetën e tyre me integritet. Prandaj, të më ofrohej një rol i tillë me aq shumë fuqi, ishte diçka shumë emocionuese për mua”.
“The Way of Water” fokusohet në personazhet, Jake Sully, Neytiri dhe fëmijët e tyre, si dhe zë vend 12 vjet pas ngjarjes së filmit të parë të lansuar në vitin 2009. Duke qenë të gatshëm ta marrin çdo masë të nevojshme për ta mbrojtur njëri-tjetrin, ata duhet të luftojnë për të qëndruar gjallë dhe për ta përballuar tragjedinë, në një luftë për një të ardhme më të mirë.
Përveç si regjisor, Cameron po ashtu vjen në rolin e producentit të filmit krahas, Jon Landau. Aktorët tjerë me role në këtë vazhdim të dytë janë: Sigourney Weaver, Stephen Lang, Cliff Curtis, Joel David Moore, Edie Falco, Jemaine Clement dhe të tjerë.
Në një intervistë të fundit për revistën “GQ”, James Cameron, e përshkroi koston e prodhimit të këtij projekti si shumë të shtrenjtë. Ai tha se vazhdimi i dytë i filmit hit të vitit 2009, “Avatar”, që shquhet si projekti më i suksesshëm në historinë e kinematografisë, ka kushtuar jashtëzakonisht shumë.
Buxheti i realizimit të “The Way Of Water” e kap shifrën prej 350-400 milionë dollarësh, duke u bërë një prej filmave më të shtrenjtë të të gjitha kohëve, krahas projekteve “Avengers: Endgame” dhe “Age Of Ultron”.
Regjisori i famshëm ka pohuar se, në mënyrë që studioja filmike prapa realizimit të këtij vazhdimi të barazohet me investimin, “The Way Of Water” duhet ta ketë një performancë marramendëse në arkat filmike botërore dhe të bëhet një prej tre ose katër filmave me fitimet më të larta në histori. Në disa intervista të kaluara, Cameron pohoi se ka mundësi që ta ndërpresë realizimin e vazhdimeve të planifikuara të filmit “Avatar”, në rast se projekti i ardhshëm, “The Way Of Water”, nuk gëzon shikueshmëri të madhe në arkat filmike botërore. Plani fillestar i regjisorit është që t’i realizojë pesë filma gjithsej.
“Avatar: The Way of Water” lansohet nëpër kinematë botërore më 16 dhjetor të këtij viti, kurse në “Cineplexx Kosova” fillon së shfaquri nga e mërkura (14 dhjetor).
