Ylli i muzikës, Taylor Swift, do ta bëjë regjinë e filmit të parë të metrazhit të gjatë, të cilin do ta realizojë në bashkëpunim me studion filmike “Searchlight Pictures”.
Kantautorja e njohur amerikane e ka shkruar një skenar filmi, derisa hollësi rreth temës që ai e trajton dhe personazheve të tij, nuk janë zbuluar ende.
Udhëheqësit e studios “Searchlight”, David Greenbaum dhe Matthew Greenfield, përmes një komunikate për media kanë deklaruar: “Taylor është një artiste dhe tregimtare e rrallë dhe e jashtëzakonshme. Është një gëzim dhe privilegj i vërtetë të bashkëpunosh me të, ndërsa ajo e fillon këtë udhëtim të ri krijues”.
Në të kaluarën, Swift e ka bërë regjinë e videoklipeve të saja muzikore, “All Too Well” dhe “The Man”, të cilat edhe u shpërblyen me çmime “MTV VMA” për regjinë më të mirë. Ajo po ashtu ka luajtur në disa projekte filmike, përfshirë këtu mjuzikllin “Cats”, komedinë romantike “Valentine’s Day” dhe filmin “Amsterdam”.
Në muajin tetor, këngëtarja e publikoi albumin e dhjetë të incizuar në studio, “Midnights”, Së shpejti ajo pritet ta fillojë turneun i cili ka për qëllim promovimin e këtij incizimi.
Studioja filmike “Searchlight Pictures” së fundmi i publikoi filmat e ri, “The Menu”, ku luajnë aktorët Anya Taylor-Joy dhe Ralph Fiennes, dhe filmin e vlerësuar lartë nga kritikët, “The Banshees Of Inisherin”, i cili pritet të jetë ndër konkurrentët kryesor në ceremoninë e ardhshme “Oscar”.
© KOHA. Të gjitha të drejtat janë të rezervuara.
