Aktorja e njohur hollywoodiane, Margot Robbie, thotë se nuk ka besuar që është aktore e mirë, deri kur e ka parë performancën e saj në filmin “I, Tonya”.
32-vjeçarja australiane e ndoqi ngjarjen “BAFTA: A Life In Pictures” në Londër, ku ndër të tjera diskutoi për rolin e saj në filmin biografik të vitit 2017.
“‘I, Tonya’ ishte hera e parë që e shikova një film timin dhe thash me vete, ‘Ok, jam aktore e zonja’”, deklaroi Robbie për “The Hollywood Reporter”.
Tutje, ajo shtoi se pas kësaj performance filloi të ndihet se është mjaftueshëm e zonja, për t’i kontaktuar idhujt e saj për ndonjë bashkëpunim, përfshirë këtu regjisorin ikonik Quentin Tarantino, i cili përfundoi duke e angazhuar Margotin për filmin e tij, “Once Upon A Time In Hollywood”.
Me regji të Craig Gillespie, “I, Tonya” e rrëfen jetën dhe karrierën e artistes së patinazhit, Tonya Harding, dhe rolit të saj në sulmin ndaj rivales, Nancy Kerrigan. Për këtë performancë, Robbie e mori një nominim për “Oscar” në kategorinë “Aktorja më e mirë”, kurse kolegia e saj në film, Allison Janney, e cila e portretizoni nënën abuzive të Tonyas, triumfoi në kategorinë “Aktorja më e mirë në rol dytësor”.
Depërtimin në Hollywood, Margot Robbie e shënoi me filmin e Martin Scorseses, “The Wolf Of Wall Street”, ku e portretizoi gruan e protagonistit Jordan Belfort, i sjell në film nga ylli i kinematografisë, Leonardo DiCaprio.
Duke folur për këtë film në një intervistë të kaluar, Margot tha se gati nuk hoqi dorë nga aktrimi pas përvojës së “tmerrshme” me famën, pas këtij roli.
“Diçka po ndodhte me mua në ato faza të hershme të karrierës dhe gjithçka ishte shumë e tmerrshme. Mbaj mend që i thashë mamasë sime që nuk mendoj se dua ta bëj këtë punë. Dhe ajo vetëm më shikoi me një fytyrë serioze dhe më tha, ‘E dashur, mendoj se tashmë është tepër vonë për t’u larguar nga ky profesion’. Kështu e kuptova se e vetmja zgjidhje për mua ishte të vazhdoja të shikoja ishte përpara”.
Së fundmi u bë i ditur lajmi se filmi i ardhshëm i aktores, “Pirates of the Caribbean”, është anuluar nga studioja “Disney”. Robbie ishte caktuar ta udhëheqë kastën e aktoreve të këtij projekti të shumëpritur nga publiku, i cili planifikohej të vinte në version të riimagjinuar nga filmi klasik, e që në rolet kryesore e përfshinte një kastë të aktoreve femra.
© KOHA. Të gjitha të drejtat janë të rezervuara.
