Komediani 84-vjeçar, Bill Cosby, i cili në të kaluarën ishte i burgosur dhe është akuzuar për sulm seksual nga 60 gra të ndryshme, është shpallur fajtor për sulm seksual ndaj Judy Huthit, ngjarje kjo që kishte ndodhur në vitin 1975 në shtëpinë Playboy.
Sipas dokumenteve ligjore, aktori i famshëm besohet se e kishte detyruar Huthin, e cila atëkohë ishte vetëm 16-vjeçare, që të kryente marrëdhënie seksuale me të. Kjo e fundit e ka përshkruar këtë incident si një prej përvojave më të rënda të jetës së saj, që e ka bërë të ndihet e zemëruar, e mashtruar dhe si budallaqe.
Thuhet se ish-ylli i serialit “Cosby Show” do të duhet t’i paguajë dëmshpërblim prej 500 mijë dollarësh, Judy Huthit, e cila tani është 64-vjeçare.
Vendimi vjen pas një periudhe dy-ditore diskutimi nga juria e përbërë prej 12 personash, e cila që nga fillimi i gjyqit në fillim të qershorit, kishte dëgjuar argumente nga shoqja më e mirë e viktimës së dyshuar, raporton portali “Female”.
Ndërkohë, avokatët e aktorit të humorit, i cili thuhet se nuk ishte i pranishëm në seancën e fundit gjyqësore, argumentuan se akuzat e Huthit ndaj klientit të tyre janë një trillim i plotë dhe se fotografitë e paraqitura në gjyq si prova, janë të gjitha një përpjekje e saj për të fituar para.
Pavarësisht padive të bëra nga një numër i madh i grave, Cosby vazhdon të jetë i lirë.
© KOHA. Të gjitha të drejtat janë të rezervuara.
