Grupi i njohur i muzikës K-Pop, “BTS”, bëri histori në platformën muzikore Spotify.
Hiti i tyre i sapolansuar, “Yet To Come”, theu rekordin e debutimit më të mirë të një kënge në gjuhën koreane.
Më 10 qershor, “BTS” e shënoi rikthimin e shumëpritur në muzikë me lansimin e albumit me këngë të përziera, “Proof”.
Krahas albumit, shtatë djelmoshat e bendit e publikuan edhe videoprojektin e ri me titull, “Yet to Come (The Most Beautiful Moment)”, i cili u mirëprit nga publiku anembanë botës.
Albumi i përfshin tri këngë të reja, “Run BTS”, “For Youth” dhe “Yet to Come”, si dhe disa hite të kaluara të bendit “BTS”.
Në ditën e parë të lansimit, të gjitha këngët e albumit “Proof” arritën të futen në toplistën e 200 këngëve më të mira në Spotify, përfshirë këtu bashkëpunimin e famshëm të tyre me rok-bendin “Coldplay”, “My Universe”.
