Premiera botërore e filmit “Jurassic Word: Dominion” në Los Angeles
Kasta e aktorëve të filmit “Jurassic Word: Dominion” u bë bashkë për ta shënuar premierën botërore të këtij vazhdimi të gjashtë në Los Angeles.
Yjet e tre filmave të fundit “Jurassic World”, Chris Pratt dhe Bryce Dallas Howard, thanë se fakti që aktorët veteran, Laura Dern, Jeff Goldblum dhe Sam Neill, iu bashkuan atyre në projektin e ri kinematografik, ishte një eksperiencë e veçantë dhe e paharruar për ta.
“Po ashtu e bëri këtë një eksperiencë shumë reale. Edhe unë u emocionova që isha pjesë e projektit për shkak se po aktroja në ekran krahas yjeve Laura Dern dhe Sam Neill”, tha Howard.
“Ne gjithmonë kemi shpresuar që ata do të pajtoheshin me gjërat që i kemi bërë me filmat ‘Jurassic World’. Por, fakti që ata na janë bashkuar në këtë projekt mund të them se është vlerësimi kryesor që mund ta merrnim. Kjo është vërtetë fantastike”, shtoi tutje Pratt.
“Jurassic World: Dominion” vjen me regji të Colin Trevorrow, por e veçanta e këtij projekti është se me role të shkurtra rikthehen edhe disa prej aktorëve të filmave të parë “Jurassic Park” si, Laura Dern, Sam Neil, Jeff Goldblum, raporton agjencia e lajmeve “AP”.
Ndër vite janë realizuar gjashtë vazhdime të filmave me dinozaurë, përfshirë këtu projektin e fundit, ngjarja e së cilit zë vend pesë vjet pas ngjarjeve të zhvilluara në “Fallen Kingdom”. Pas shkatërrimit të ishullit “Isla Nebular”, dinozaurët e pazbutshëm mbesin të lirë nëpër botë. Tani, njerëzit duhet të mësojnë të bashkekzistojnë me krijesat e rrezikshme.
“Ky projekt na duket sikur foshnja jonë kolektive. Kemi punuar shumë dhe për një kohë të gjatë rreth këtyre filmave. Unë i kam kaluar nëntë vjetët e fundit të jetës duke u bërë gati për këtë moment. Prandaj ndihem jashtëzakonisht i emocionuar, por tani jemi këtu të gjithë së bashku dhe kjo do të thotë shumë për ne. Shpresoj që edhe publiku do ta pëlqejë filmin ashtu siç e pëlqejmë ne”, deklaroi regjisori Trevorrow.
Aktori, BD Wong, i cili ka luajtur në filmin e parë “Jurassic Park” të publikuar në vitin 1993, dhe së fundmi iu bashkua trilogjisë “Jurassic World”, tha se i pëlqen fakti që kasta e aktorëve të këtij projekti është zgjeruar.
“Më pëlqen shumë kjo gjë, ku personazhet e vjetra bashkohen me protagonistët e filmave të fundit. Në këtë projekt ekzistojnë momente ku pothuajse të gjithë aktorët janë së bashku në një vend, dhe kjo është paksa emocionuese për mua. Duket sikur ky grup i larmishëm njerëzish e përfaqëson botën në të cilën jetojmë sot, me të gjitha situatat që duken pothuajse të pamundura dhe dërrmuese. Dhe në fund, të gjithë ne mbështetemi te njëri-tjetri dhe përpiqemi ta gjejmë zgjidhjen për diçka që duket e pamundur”.
Në film po ashtu luajnë aktorët: DeWanda Wise, Emily Carmichael, Mamodou Athie, Scott Haze, Elva Trill, Daniella Pineda, Omar Sy, Dichen Lachman dhe Campbell Scott.
“Jurassic World: Dominion” ka filluar së shfaquri nëpër kinematë e Amerikës nga 10 qershori.
