Komediani Chris Rock ka thyer heshtjen pas goditjes që mori nga aktori Will Smith në skenën e “Oscars” të dielën. Komediani në një shou në Boston të mërkurën u shpreh shkurt se ende është duke “e përpunuar” atë që ndodhi në fundjavë.
57-vjeçari të dielën bëri shaka për pamjen e bashkëshortes së Smithit, Jada Pinkett Smith, live në skenën e “Oscars”. Smith doli në skenë dhe e goditi shuplakë Rockun duke marrë vëmendjen edhe nga ndarja e çmimeve për më të mirët.
Teksa Smith ka kërkuar falje publike, Rock ende s’kishte komentuar ngjarjen.
Të merkurën, në shoun e tij, Rock nisi paraqitjen para audiencës duke i pyetur ndjekësit “Si ishte fundjava juaj?”.
Pasi u mirëprit me duartrokitje të shumta, ai vazhdoi duke thënë se dëshiron të jetë i drejtpërdrejtë për çështjen duke shtuar se “s’ka asgjë për të thënë”.
“Jam duke e përpunuar se çka ka ndodhur, andaj një ditë do të flas për këtë”, u shpreh 57-vjeçari duke shtuar se “do të jetë serioze e pak humor”.
Smith në një shkrim në Instagram ditën pas ngjarjes kishte kërkuar falje. Ai e kishte cilësuar si tepër të rëndë shakanë për gjendjen mjekësore të bashkëshortes, që ka kokën e rruar për shkak të alopecias.
Akademia ka hapur procedurë disiplinore ndaj Smithit.
