Diva e muzikës, Beyonce, raportohet se është në bisedime për të performuar në kuadër të ceremonisë “Oscar”.
Ylli i zhanrit R&B është në mesin e artistëve të nominuar për çmimin “Kënga më e mirë origjinale”, për kolonën zanore të filmit biografik, “King Richard”, i cili flet për kampionet e tenisit, Venus e Serena Williams si dhe babanë e tyre trajner, Richard Williams.
Sipas portalit “Variety”, këngëtarja e hitit “Run the World” ka mundësi ta performojë këtë këngë nga një fushë e tenisit në Compton, ku ikonat e këtij sporti kishin ushtruar kur ishin fëmijë, bashkë me prindërit e tyre.
Qëllimi është që interpretimi i Beyonces të përshtatet me temën e filmit, e më pas gjithë performanca t’i bashkëngjitet ceremonisë.
Madje, sipas disa burimeve, thuhet se aktori Will Smith i cili e portretizon rolin kryesor në filmin “King Richard”, ka mundësi t’i bashkohet këngëtares së famshme në Compton, para se të kthehet në bulevardin e Hollywoodit për ta përcjellë pjesën e mbetur të ceremonisë, ku edhe garon për çmimin “Aktori më i mirë”.
Emra të mëdhenj të kinematografisë të tillë si, Bill Murray, Lady Gaga, Kevin Costner, Anthony Hopkins, Lily James, Zoe Kravtiz, Simu Liu, Rami Malek, Chris Rock dhe Uma Thurman, do të shërbejnë si lajmërues të fituesve në kategoritë e ndryshme të mbrëmjes.
Ceremonia e sivjetme “Oscar” zë vend më 28 mars, në teatrin “Dolby” në Los Angeles.
© KOHA. Të gjitha të drejtat janë të rezervuara.
