Shou muzikor shumë i ndjekur në Amerikë, “The Voice”, këtë vit nuk e shpalli një por tre fitues.
Grupi i përbërë nga dy vëllezër dhe një motër, “Girl Named Tom”, që ishte pjesë e ekipit të këngëtares së famshme, Kelly Clarkson, triumfoi në edicionin e 21-të të emisionit të kanalit NBC, “The Voice”, duke e mundur konkurrencën e fortë sivjet dhe duke u bërë grupi i parë që e fiton këtë shou.
Fituesit u shpallën të martën mbrëma në spektaklin final të mbushur me performanca të bukura nga konkurrentët, dhe interpretimet e jashtëzakonshme të emrave të njohur të muzikës.
Caleb, Joshua dhe Bekah Liechty, e mposhtën konkurrenten tjetër nga ekipi i Clarksonit, Hailey Mia, dhe finalistët Wendy Moten dhe Paris Winningham, nga ekipi i yllit të muzikës country Blake Shelton, dhe Jershika Maple nga ekipi i këngëtarit John Legend.
Në performancën e fundit në këtë shou, grupi “Girl Named Tom” solli interpretime mbresëlënëse të këngëve, “Baby Now That I’ve Found You” nga grupi britanik i muzikës soul “The Foundations”, dhe “The Chain” nga rok bendi i njohur “Fleetwood Mac”.
Në natën finale, Caleb, Joshua dhe Bekah, e realizuan edhe një tjetër ëndërr që ishte ndarja e skenës me mentoren e tyre, Kelly Clarkson, me të cilën e performuan hitin “Leave Before You Love Me”, nga Marshmello dhe “Jonas Brothers”.
Clarkson e shfrytëzoi rrjetin social Twitter për ta festuar fitoren e kampionëve të saj.
“Nuk mund të isha më e emocionuar se kaq për grupin @girlnamedtom dhe #TeamKelly!!!”, kishte shkruar këngëtarja.
Kjo është hera e katërt që një prej artistëve nga ekipi i Kellyt shpallet fitues i “The Voice”.
Treshja fituese vjen nga shteti Ohio i Amerikës dhe aktualisht jetojnë në South Bend të Indianas.
© KOHA. Të gjitha të drejtat janë të rezervuara.
