Aktorët e “Harry Potter” do të ribashkohen për një shou special
Foto: AP/Associated Press
Ekipi origjinal i filmave “Harry Potter” do të ribashkohet për një emision special të realizuar nga “HBO”, dhe që e ka për qëllim ta festojë 20-vjetorin e lansimit të filmit të parë, “Harry Potter And The Philosopher’s Stone”.
Daniel Radcliffe, Rupert Grint dhe Emma Watson, krahas regjisorit Chris Columbus dhe aktorëve tjerë të projekteve të famshme kinematografike, do të përfshihen në shoun special të titulluar, “Harry Potter 20th Anniversary: Return To Hogwarts”, i cili do ta shënojë premierën më 1 janar të vitit të ardhshëm në platformën HBO Max në Amerikë. Më vonë ai do të lansohet edhe nëpër vende tjera të botës.
Ndër aktorët tjera të filmave të bazuar në librat bestseller që do të jenë pjesë e shout, janë: Robbie Coltrane, Helena Bonham Carter, Ralph Fiennes, Jason Isaacs, Gary Oldman, Imelda Staunton, Tom Felton, James Phelps, Oliver Phelps, Mark Williams, Bonnie Wright, Alfred Enoch, Matthew Lewis, Evanna Lynch dhe Ian Hart.
Sipas HBO Max ky emision do ta tregojë një histori magjepsëse përmes intervistave të reja, të thella dhe bisedave me aktorët.
“Ka qenë një udhëtim i jashtëzakonshëm që nga debutimi i filmit ‘Harry Potter And The Philosopher’s Stone’, dhe të dëshmosh se si ai ka evoluar në këtë univers të jashtëzakonshëm të ndërlidhur, ka qenë të paktën magjike. Kjo retrospektivë është një homazh për të gjithë, jetët e të cilëve u prekën nga ky fenomen kulturor, nga kasta dhe ekipi i talentuar që derdhën zemrën dhe shpirtin e tyre në këta filma të jashtëzakonshëm, e deri tek fansat e pasionuar që vazhdojnë të mbajnë gjallë shpirtin e botës së magjistarëve, edhe 20 vjet më vonë”, ka deklaruar Tom Ascheim, president i kompanisë “Warner Bros. Global Kids, Young Adults and Classics”
Filmat “Harry Potter” bazohen në shtatë librat e autores J.K Rowling. Nga atëherë hollywoodi i ka realizuar edhe 2 filma të bazuar në këtë histori, por që zënë vend para ngjarjeve të “Harry Potter”, të titulluar “Fantastic Beasts And Where To Find Them” dhe “Fantastic Beasts: The Crimes of Grindelwald”.
