Kevin Hart nuk i jep rëndësi “kulturës së anulimit”

Hart për gazetën “The Sunday Times” foli për filmin e tij të fundit, “Fatherhood”, por e shfrytëzoi rastin t’i përmend edhe kritikat negative që i ka marrë në të kaluarën.

Në vitin 2018, aktori u detyrua të heq dorë nga roli i prezantuesit të ceremonisë prestigjioze, “Oscar”, kjo pasi në rrjetet sociale filluan të qarkullojnë disa postime homofobike të cilat Hart i kishte bërë para një dekade. Ai u kritikua ashpër nga publiku për komentet e tij dhe disa materiale humoristike të së kaluarës, saqë disa njerëz e kërkuan edhe bojkotimin e tij si aktor dhe komedian.

“Nëse njerëzit duan të gjejnë gjëra për të më kritikuar, duke u kthyer prapa në kohë dhe duke mbledhur postime të cilat janë shumë të vjetra, atëherë janë të lirë ta bëjnë këtë. Unë nuk kam çfarë të bëjë në këtë drejtim. Por duhet ta dini, se në këtë mënyrë po e kritikoni një version tjetër timin, kur isha një komedian ende i ri i cili provonte të jetë qesharak, dhe fatkeqësisht kisha dështuar në qëllimin tim. Unë tashmë kam kërkuar falje për gabimet e së kaluarës, dhe sot e kuptoj si mund të kenë tingëlluar gabimisht fjalët e mia. Kur i mendoj këto gjëra nga e kaluara, më vjen turp dhe ndihem në siklet për veten time. Prandaj e them se jam rritur dhe jam pjekur si person”.

Hart fillimisht kishte refuzuar të kërkojë falje pas skandalit që shkaktuan komentet e tij, pak para ceremonisë “Oscar”, duke thënë se ai tashmë e kishte bërë një gjë të tillë përmes një interviste të realizuar në vitin 2015. Por në vonë tha se i vjen keq për fjalët e tij të pandjeshme.

“Unë personalisht nuk brengosem për kulturën e anulimit. Nëse dikush ka bërë diçka që me të vërtetë ka qenë e dëmshme, atëherë duhet t’i vuaj pasojat e veprimeve të veta”.

Madje fenomenin e ‘kulturës së anulimit’, aktori e krahasoi me pritjet se njerëzit shkojnë në burg për të mësuar nga gabimet e tyre, por pastaj kur lirohen nga burgu kanë problem të gjejnë punë, pavarësisht se janë përmirësuar.

“Kur kemi arritur në këtë pikë ku jeta duhet të jetë e përkryer? Ku njerëzit duhet të sillen në mënyrë të përkryer gjatë gjithë kohës. Unë jam anuluar nga shoqëria tri apo katër herë. Por asnjëherë nuk jam brengosur për këtë gjë. Nëse e lejon që veprimet e këtilla të kenë efekt mbi ty, atëherë ashtu do të ndodhë. Unë personalisht nuk funksionoj kështu. Unë e kuptoj që jemi thjeshtë qenie njerëzore. Secili mund të ndryshojë nëse dëshiron”.

Kevin Hart gjithashtu foli për këtë eksperiencë të hidhur në jetën dhe karrierën e tij, në dokumentarin special të Netflixit të lansuar në vitin 2019, “Kevin Hart: Don’t F**k This Up”.

Ky projekt i përfshinte edhe disa skena ku anëtarë nga ekipi i publicitetit të aktorit, e shtynin atë që të kërkonte falje për komentet homofobike të së kaluarës, duke ia kujtuar nuk po i rrezikohej vetëm karriera dhe jeta e tij, por e gjithë familjes dhe njerëzve që punojnë për të.

© KOHA. Të gjitha të drejtat janë të rezervuara.