Продолжуваат масовните протести во Србија

Илјадници демонстранти маршираа низ улиците на Белград во саботата вечерта, една недела по упадот во зградата на телевизијата во знак на протести против, како што велат, автократското владеење на претседателот Александар Вучиќ и пристрасното покривање на протестите од медиумите.

Саботните протести ја одбележаа 16-тата недела од протестите против владата на Вучиќ. Илјадници демонстранти се собраа пред зградата на Српската радио-телевизија барајќи слобода на медиумите.

Држеа црвени рози и свеќи во рацете во знак на сеќавање на новинарите кои беа убиени во Србија во последните 30 години, пишува rel.

На 16 март, демонстрантите предводени од лидерот на десничарската опозиција Бошко Обрадовиќ насилно влегоа во зградата на државната телевизија РТС, барајќи да им се обратат на народот.

Нивното барање не е исполнето и при полициската интервенција се уапсени најмалку 18 лица.

По минатонеделните протести, претседателот вети дека ќе го заштити законот и редот во земјата.

„Јас сум нивна цел во моментот кога сакам да воспоставам политичка консолидација и економски развој“, рече тој.

исто така СВЕТОТ 27 јануари 2026 Илјадници протестираа во Белград против репресијата врз студентското движење

Од 8 декември минатата година секоја сабота во Белград се одржуваат антивладини протести „Еден од пет милиони“. Во меѓувреме, тие се проширени и во други градови во Србија.

Демонстрантите, меѓу кои има јавни личности, опозициски политичари, универзитетски професори и други, бараат повеќе простор на јавната телевизија, потоа откривање на нарачателите и извршителите на, како што велат, нападите врз граѓани, новинари, активисти и политичари, како и објавување на „план за решение на косовското прашање“.

Минатиот месец Фридом Хаус - меѓународна организација за слободи и човекови права во светот - го објави својот годишен извештај, во кој Србија ја симна од категоријата слободни земји во делумно слободна земја.