Mbi 40 mijë euro gjoba nga hyrjet e veturave në “Xhorxh Bush”
FOTO: Driton Paqarada/KOHA
Është e ndaluar për qarkullim të veturave, mirëpo kjo makinë nuk po e respekton vendimin e Komunës së Prishtinës dhe po kalon nëpër rrugën “Xhorxh Bush”.
Si pasojë e kësaj, afër 40 mijë euro i janë shtuar thesarit të komunës vetëm nga kjo rrugë nga gjobat e shqiptuara.
Sipas Policisë, që nga mbyllja e rrugës janë shqiptuar 985 tiketa.
“Nga data kur ka filluar ndalimi i qarkullimit të automjeteve (përveç autobusëve urbanë dhe automjeteve taxi), në rrugën ‘Xhorxh Bush’, njësia e komunikacionit rrugor për qytetin e Prishtinës ka lëshuar 985 tiketa për ngasësit, të cilët nuk e kanë respektuar shenjën e vendosur nga Komuna e Prishtinës. Shenja ka përcaktuar qarkullimin e automjeteve të caktuara. Gjoba për kundërvajtje është 40 euro”, thuhet në përgjigjen e Policisë për KOHËN.
Për qytetarët shenjat që tregojnë se ndalohen vetura janë të vendosura brenda rrugës “Xhorxh Bush”, gjë që e bën të pamundur kthimin prapa.
“Unë mendoj që kjo shenjë nuk është vendosur mirë, por në mënyrën e gabuar. Shenja është vendosur në brendi të rrugës dhe jo në fillim si është dashur të vendoset, duhej të ishte e vendosur në kthesë që ta shohin shoferët, sepse pasi të hyjnë nuk mund të kthehen. Në mungesë të informacioneve qytetarët po gjobiten”, ka thënë qytetari Ardit Restelica.
Kurse, sipas Era Krasniqit, shenja duhej të vendosej së paku 20 metra larg rrugës.
“Shenja njëkahëshe duhet të jetë më përpara, sepse këtu ku është vendosur është vonë, pasi veturat të kthehen është vonë edhe ta shohin shenjën. Sidomos veturat që vijnë nga regjionet e tjera ata nuk janë tënjoftuar që kjo rrugëështë e ndaluar për qarkullim. Kjo shenjëështë dashur të vendoset për 15 deri 10 metra më poshtë në mënyrë që të shihet. Gjobat nuk janë të drejta kur shenja nuk është e vendosur në mënyrë adekuate”, ka thënë Krasniqi.
“Çka është duke bërë kryetari i komunës nuk është në rregull dhe po e turpëron titullin që e mban. Është duke e ngulfatur qytetin. Ai për Londër ka larëpjata dhe tani po vjen këtu po bën eksperimente. Runa zot prej kuadrove që nuk dinë, jo nuk është vendosur drejt shenja dhe nuk i duhen këto gjëra Prishtinës fare. Kjo duhet të jetë rrugë e qytetarëve dhe jo e taksave. Arsyeja e gjobitjes së qytetarëve është sepse këtyre po u duhen para”, është shprehur qytetari Njazi Tafilaj.
Drejtori për Shërbime Publike në Komunën e Prishtinës, Ilirik Musliu, e mohon mungesën e sinjalistikës para futjes në “Xhorxh Bush”.
“Ne së bashku me forcën e mobilitetin dhe task forcën e komunikacionit, deri më tani i kemi vendosur 22 shenja që kanë tëbëjnë me sinjalistikën dhe shenjëzimin. Që i njofton qytetarët që prej datës 11 janar është e hapur për kyçje vetëm për autobusë, taksi dhe vetura emergjente. Ne çdo ditë po marrim raport ditorë në lidhje me gjobat e shqiptuara në trafik nga policia dhe nga të dhënat del që tani për momentin nuk kemi qytetarë me tabela 01 që gjobiten, të gjithë shkelësit janë të rajoneve të tjera të Kosovës që vijnë në Prishtinë”, ka deklaruar Musliu.
Musliu thotë se do ta do ta fusin në funksion edhe projektin e dytë që parasheh më shumësinjalistikë.
“Ne jemi mobilizuar që ta fusim në funksion edhe projektin e dytë që parasheh sinjalistikë dhe shenjëzim më të zgjeruar për këtë rrugë, me qëllim që informatat të arrijnë edhe më larg. Në rrethin te Kisha Katolike, te Ministria e Drejtësisë kur vjen deri te Hotel Grandi, për t’u kyçur në këtë rrugë. Këto janë disa kyçje në të cilat do të vendoset sinjalisikë dhe portale ekstra. Shenjat të cilat janë vendosur edhe tash janë në rregull sepse janë vendosur konform rregullave të komunikacionit”, ka shtuar ai.
Aktualisht në rrugën e destinuar për këmbësorë e transport publik po punohet ende në largimin e ishullit të gjelbërt dhe vendosjen e kubëzave.
