Me rritjen e çmimit të derivateve është rritur edhe numri i udhëtarëve në transportet publike të Prishtinës.
Por, bashkë me ta janë rritur edhe çmimet e biletave në sektorin privat.
Përderisa në zonën 1, nga 40 centë janë rritur çmimet e biletave në 50 centë, zona 2 nga 50 ka bërë një biletë 60 centë.
Për ngritjen e këtij çmimi ata thonë se kanë bërë disa herë kërkesa në Komunë të Prishtinës, pasi nuk morën ndonjë përgjigje, kompanitë private kanë bërë ndryshimin e çmimit pa leje komunale.
Kompania Private “24 Yjet”, që operon nga zona e Hajvalisë në qendër, thotë se ata kanë qenë të detyruar të bëjnë një ndryshim të tillë për shkak të rritjes së çmimit të naftës.
Sipas tij, ata po presin përfshirjen e sektorit privat nën menaxhimin e komunës, në këtë mënyrë edhe do të paguhen për kilometër, siç funksionon tani “Trafiku Urban”.
Izet Ismajli, kryetar i Shoqatës së transportuesve privatë, thotë se sektori privat është në një gjendje të rënduar, në këtë mënyrë zona 1 dhe 2 janë detyruar të bëjnë ngritje për 10 centë.
“Kur është ngritur në 50 centë në zonën e parë, zona e dytë automatikisht ka ngritur çmimin në 60 centë. Kur ka qenë 40 centë zona 1 është bërë 50 centë, ndërsa zona dy më parë ka qenë 50 centë, ndërsa tani është bërë 60 centë. Hajvalia dhe 7B janë zona të dyta, pra tejkalojnë qendrën dhe kalojnë në zonën e dytë dhe çmimorja është zonë e dytë”, tha Izet Ismajli.
Nga Komuna e Prishtinës thonë se ka kohë të gjatë që sektori privat ka bërë kërkesë për rritjen e çmimit të biletave, mirëpo për shkak se ata nuk kanë licencë të operimit, komuna nuk ka mundur t’ua miratojë apo jo këtë kërkesë.
Drejtori i Shërbimeve Publike, Ilirik Musliu, ka arsyetuar këtë ngritje të çmimit, duke thënë se me rritjen e derivateve, BERZH-i ka kërkuar edhe ngritjen e çmimit edhe të “Trafikut Urban”.
Sipas Musliut, me masterplanin e ri, edhe sektori privat do të jetë nën menaxhimin e komunës e në këtë mënyrë çmimi i biletës do të bëhet 50 centë për gjithë transportin publik.
“Realisht kanë një arsyeshmëri mbrapa, janë rritur derivatet. Edhe çmimi i biletës për trafikun urban, është caktuar në një kohë kur çmimi i derivateve ka qenë 90 cent, ndërsa tani kur po flasim është dublifikim dhe nuk ka pasur fare ndryshim të çmimit. “Është kërkesë e berzhit për ngritjen e çmimit të Trafikut Urban, andaj në bazë të diskutimit të Berzh, sektori privat ka pasur të drejt në ndryshim të çmimit... ne momentin që do i marrim nën menaxhim edhe sektorin privat, çmimi do të jetë i integruar”, pohoi Musliu
Me zbatimin e planit të mobilitetit, sipas Musliut, do të bëhet riorganizimi i të gjitha linjave, për t’u bërë të gjitha zonat me transport.
“Qëllimi është që të implementojmë planin e mobilitetit që thotë se duhet të jenë 161 autobus me operu në kryeqytet dhe për t’i plotësuar nervojat e kryeqytetit sa i përket transportit publike 81 nga trafiku urban dhe 80 nga sektori privat. 51 janë në trafikun urban, pjesa tjetër tash fillon procedura me qëllim që të ten derohet dhe mbyllet pjesa e trafikut urban me 81 autobusë. Po mendojmë të kemi kërkesë edhe në flotën e re përveç atyre elektrik që do të shfrytëzohen brenda qarkores, unazës njëkahore, mendojmë të kemi edhe minibus për arsye se kërkesat që kemi marrë, formati i cili është i autobusëve të tanishëm nuk është i përshtatshëm për zonat rurale. Mendojmë t’i kemi edhe disa linja të shkurta brenda zonës urbane dhe të cilat mendojmë t’i shfrytëzojmë këta minibus”, deklaroi Ilirik Musliu, drejtor i Shërbimeve Publike.
Në këtë mënyrë, sipas komunës, kompanive private të transportit do t’iu bëhen kontratat afatgjate, e të cilat do t’ua hapin rrugën për investime në flotën e re të tyre.
© KOHA. Të gjitha të drejtat janë të rezervuara.
