2 perditesime
20:35

Rama e Vitia premtojnë se do t’i ndalin punësimet partiake në ndërmarrjet publike

Kandidatët për kryetar të Prishtinës, Përparim Rama i LDK-së dhe Arben Vitia i LVV-së kanë thënë se do t’i ndalin punësimet partiake në ndërmarrjet publike.

Vitia ka thënë se ndërmarrjet publike nuk janë çerdhe punësimi politike.

Sipas tij, performanca e këtyre ndërmarrjeve janë tepër të rëndësishme.

“Performanca e tyre do të jetë vazhdimisht e mbikëqyrur dhe çdo punësim do të ketë kritere shumë të qarta”, ka shtuar ai.

E Rama ka thënë se punësimet do të jenë vetëm profesionale.

“Stafi do të jetë i mbushur me ekspertë varësisht se nga cila parti politike janë. Deri tash ka ndonjë një tragjedi, sepse në mënyrë të paditur kanë thyer azbestin dhe ajo që kanë bërë është shumë e dëmshme për vet punëtorët dhe personat tjerë”, ka thënë ai.

Ata tutje kanë treguar prioritetet e tyre për shëndetësinë.

Rama ka thënë se për shëndetësinë duhet të vendoset sistemi informativ shëndetësor e po ashtu edhe rregullorja.

“I gjithë stafi duhet të kenë rregullore në bazë të cilave ata edhe sillen me komunitetin. Të njëjtën kohë edhe qytetarët me stafin mjekësor. Do të jetë një respekt i dyanshëm”, ka thënë ai.

E Vitia ka premtuar se shumë gjëra do të bëhen për Shëndetësinë.

“Përkundër modernizimit dhe qasjes, e para do të jetë investimi në diagnostikim, preventiva, duke filluar nga programet e ndryshme të edukimit. Funksionalizimi i spitalit të qytetit dhe trajnimet e vazhdueshme të stafit shëndetësor”, ka thënë ai.

Ai ka shtuar se do të ketë këshillimore për nënat e reja.

20:29

Vitia e Rama tregojnë se cila do të jetë puna e parë pasi të betohen si kryetar i Prishtinës

Kandidatët për kryetar të Prishtinës, Arben Vitia nga Lëvizja Vetëvendosje dhe Përparim Rama nga Lidhja Demokratike e Kosovës kanë treguar se cila do të jetë puna e tyre e parë si kryetar.

Vitia ka thënë se ka shumë punë. Sipas tij projekti i disa parqeve do të fillojë menjëherë në muajt e parë.

“Rruga do të filloj në pranverën e vitit 2022, unaza po ashtu menjëherë. Janë një kompleks i probleme që kërkojnë qasje proaktive nga dita e parë”, ka thënë ai.

Ndërkaq Rama ka premtuar se me t’u betuar si kryetar, do t’i lirojë trotuaret për këmbësorë.

Vitia e Rama kanë treguar se kur do të jetë Prishtina pa lloçë.

Rama i LDK-së ka thënë se lloçi duhet në zonat e gjelbra.

Ai ka thënë se nuk tenton ta bëjë të gjithën pa lloç sepse qytetit i duhet biodiversitet, por ka thënë se katër vjetët e ardhshme do ta definojnë Prishtinën si kryeqytet me karakter unik në botë.

E Vitia ka thënë se Prishtina shumë shpejtë do të jetë pa lloçë.

Sipas tij, ata e kanë në program mbi 150 milionë euro buxhet që do të investohen në të gjitha rrugët e Prishtinës gjithashtu edhe në parqe dhe ambiente rekreative.

“Personi do të jetë para betonit, dhe është jetike që këto parqe do të jenë të rregulluara mirë”, ka thënë ai.

 

20:26

Projektet kryesore për Prishtinën, flasin Vitia e Rama

Dy kandidatët për kryetar të Prishtinës, Arben Vitia nga VV-ja dhe Përparim Rama nga LDK-ja, kanë shpalosur projektet kryesore për mandatin 4-vjeçar.

Këta dy kandidatë, që të dielën do të garojnë në raundin e dytë të zgjedhjeve, kanë folur në emisionin për Prishtinën “038”, në KTV.

“Ridefnimi i qendrës dhe ndërlidhja me lagjet përreth që do ta transformojë qytetin për këmbësorë, për tarfik urban e trafik alternativ. Do ta lidhim qendrën nëpërmjet platformës me lagjen Arbëria, nëpërmjet platformës me Kodrën e Trimave, nëpërmjet nënkalimit me Prishtinën e Vjetër, nëpërmjet platformës me Aktashin dhe gjithë Kodrën e Diellit, nëpërmjet nënkalimit me Lagjen e Spitalit dhe Ulipanën dhe nënkalimit tjetër me Kalabrinë dhe Dardaninë”, ka thënë Rama.

E Vitia, në të njëjtën pyetje, për projektet kryesore, është përgjigjur për rregullim të trafikut dhe për shkolla e çerdhe.

“Rregullimi i kaosit të trafikut më katër masa kryesore: Investimi në rrugë të reja, shtimi i autobusëve për Trafik Urban, trotuare dhe hapje të korridoreve të reja që do ta ulin qarkullimin e veturave në qytet”, ka thënë Vitia.

Ai tha se Prishtina me të si kryetar, do të bëhet qytet i jetueshëm dhe rekreativ me hapësira të mjaftueshme të trotuareve, me parqe e veranda.

“Do të dyfishojmë numrin e çerdheve në qytet dhe do të ndërtojmë çerdhe në çdo fshat që ka 100 fëmijë të moshës 0-6 vjeç. Do të modernizojmë infrastrukturën shkollore, do të ndërtojmë pesë shkolla dhe do të bëjmë analizë nëse ka nevojë edhe për 3 shkolla”, shtoi Vitia.