Lokalet 2021

Kronika Zgjedhore/ Jashari zhvillon fushatë duke shkelur masat anti-COVID

Kandidati i pavarur për kryetar të Skenderajt, Bekim Jashari, fushatën zgjedhore për zgjedhjet e 17 tetorit e ka fokusuar kryesisht me takime me qytetarë, në oda e shtëpi. Në pothuajse çdo tubim të tij janë parë shkelje të masave anti-COVID.

Dy javët e para të fushatës zgjedhore të kandidatit të pavarur për kryetar të Skenderajt, Bekim Jashari, janë shoqëruar me shkelje të masave anti-COVID.

Shumë qytetarë, pa respektuar distancën e pa maska, janë parë edhe në takimet e fundit, që Jashari ka zhvilluar me banorë të fshatit Vojnik dhe Kopiliq të Epërm.

Në fotot e publikuara nga vetë ai, shihet se pothuajse të gjithë të pranishmit janë pa maska.

Jashari, i cili është edhe kryetar aktual i Skenderajt, po gjen përkrahje edhe nga deputeti i Partisë Demokratike e Kosovës, Bekim Haxhiu, i cili është prezent në shumicën e tubimeve elektorale të tij.

Mbi 1000 vende të reja të punës në Parkun Industrial, e stadium me kapacitet deri në 4 mijë e 500 ulëse kanë qenë disa nga pak projektet që ka shpalosur Jashari deri tani, përmes rrjetit social në Facebook.

“Do vazhdoj edhe më fuqishëm për mandatin tonë të dytë, duke krijuar vende të reja të punës, infrastrukture moderne sportive, duke u nisur nga politgonet sportive në fshatra”, ka premtuar ai.

Për dallim nga kandidatët e tjerë, Jashari ka vendosur që më shumë hapësirë t’u jepet prezantimit të projekteve që ka realizuar dhe kandidatëve që garojnë për ulësen e asamblistit.