A e dini se askush nuk e di recetën e saktë për sallatën ruse? Një nga sallatat më të njohura në botë u krijua 150 vjet më parë në një restorant elegant në Moskë dhe, megjithëse shumë u përpoqën ta vidhnin recetën e saj, askush nuk mundi dhe sekreti i saj humbi përgjithmonë. Kjo është historia e kësaj pjate ruse që njerëzit e shijojnë në mbarë botën.
Historia e sallatës Olivier
Shumica prej jush e njohin atë si sallatë ruse, por disa ende e quajnë atë me emrin e saj origjinal: sallata Olivier. Historia e kësaj pjate ka aromën e një romani misterioz. Si fillim, nuk dihet nëse shefi i kuzhinës që shpiku recetën e tij, ishte francez, zviceran apo belg. E vërteta është se ai fliste frëngjisht dhe ishte ekspert i kuzhinës franceze. Në vitin 1860 ai hapi një restorant të shtrenjtë në Moskë, "The Hermitage". Nga të gjitha pjatat e servirura atje, më e pëlqyera ishte një sallatë e cila përbëhej nga një përzierje e pasur përbërësish me një salcë të veçantë që e bënte atë të parezistueshme. Pjata mori emrin e shefit: sallata Olivier.
Askush nuk e dinte recetën e sallatës dhe Olivier kishte një dhomë të veçantë në kuzhinën e restorantit ku askush tjetër nuk kishte qasje. Aty ai përgatiti fshehurazi krijimin e tij të shijshëm, kështu që askush nuk mund ta zbulonte recetën e tij. Sallata u bë aq e famshme, sa vetë Car Aleksandri II shkoi në Hermitage për ta provuar. Më 1883, Lucien Olivier vdiq dhe e mori sekretin e pjatës së tij në varr, pasi ai nuk e shkroi kurrë recetën dhe asnjë nga ndihmësit e tij nuk e pa se si e përgatiti atë. Restoranti i tij, “The Hermitage”, u mbyll përfundimisht më 1905.
Cilët janë përbërësit e sallatës Olivier?
Sallata Olivier ishte një pjatë e krijuar për shijen e rusëve fisnikë dhe të pasur që e donin aq shumë kulturën franceze në fund të shekullit 19. Gjëja e rëndësishme për suksesin e saj ishte grumbullimi i përbërësve shumë ekskluzivë dhe të shtrenjtë që e bënin gjellën diçka të disponueshme vetëm për të pasurit. Sallata Olivier i plotësonte të gjitha këto kërkesa, madje mund të na duket një pjatë mjaft ekstravagante.
Kjo pjatë mund të ketë deri në 100 përbërës të ndryshëm. Midis tyre ishin karavidhet, havjari, mish dreri, fazani dhe lloje të tjera të shtrenjta mishi. Të gjitha këtyre, Oliveri do t'i shtonte vezën e zier, turshitë dhe patatet, mes përbërësve të tjerë, të prera në copa shumë të vogla. Së fundi përzierjes iu shtua sekreti i madh: salca. Salca ishte një lloj majoneze me shumë barishte të ndryshme dhe ndoshta mustardë që përzihej shumë mirë me pjesën tjetër të sallatës për ta bërë atë të shijshme, shkroi Redkalinka.com.
Vjedhja e recetës
Siç e kemi parë, shefi i kuzhinës Olivier përpunoi recetën e tij më të çmuar në një dhomë private ku askush nuk mund të hynte gjatë kohës që ai punonte. Por një ditë, duke përgatitur një sallatë, ai duhej të largohej nga restoranti dhe e la derën hapur. Një nga ndihmësit e tij, Ivan Ivanov, përfitoi nga situata dhe hyri në dhomën private të Oliverit, ku pa gjithçka në tavolinë. Sekreti ishte para syve të tij, por ai nuk mund ta dinte se në çfarë përmasash duhej të përdorte secilin përbërës. Megjithatë, ai mund të bënte një supozim se si ishte përgatitur sallata.
Pas atij episodi, Ivanov la punën e tij në Hermitage dhe shkoi me recetën e tij në një restorant tjetër: “Moskva”. Atje ai u bë shefi i kuzhinës që solli në botë një sallatë të ngjashme në mënyrë të dyshimtë, të cilën e quajti Stolichny Salad. Kjo sallatë konsumohet edhe sot, e cila njihet edhe si sallata ruse. Ky është një imitim i sallatës origjinale Olivier, por me përbërës më të thjeshtë.
Sallata Olivier sot
Sallata Olivier u bë aq e famshme sa shumë vende filluan të bënin versionin e tyre. Përbërësit më të shtrenjtë u hoqën dhe u zëvendësuan me më të lirë në varësi të vendit ku e përgatisnin: peshk, bizele, karota etj... Në shumë shtete sallata Olivier njihet si sallata ruse ose sallata me patate, ndërsa të tjerat e mbajnë emrin origjinal, sallata Olivier.
