Mjekët zbulojnë se ilaçi kundër HIV-it mund t’i parandalojë 1 mln raste të Alzheimerit çdo vit

Sëmundja e Alzheimerit prek afro 7 milionë amerikanë dhe parashikohet që ky numër të dyfishohet deri në vitin 2060, duke arritur në 13.9 milionë raste. Meqë kjo sëmundje është e pashërueshme dhe me pasoja të rënda, shkencëtarët po kërkojnë vazhdimisht mënyra për ta parandaluar apo ngadalësuar përparimin e saj, ka raportuar New York Post.

Tani, një studim i ri ka zbuluar se një grup ilaçesh të zakonshme kundër HIV-it, të njohura si inhibitorë të transkriptazës së kundërt të nukleozidit (NRTIs), mund të ulin ndjeshëm rrezikun për të zhvilluar Alzheimer.

Studiuesit analizuan të dhënat e mbi 270,000 pacientëve mbi moshën 50 vjeçe dhe kanë zbuluar se rreziku për Alzheimer ulej me 6 deri në 13% për çdo vit që pacientët kishin përdorur këto ilaçe.

“Është vlerësuar se mbi 10 milionë njerëz në botë diagnostikohen çdo vit me sëmundjen e Alzheimerit. Rezultatet tona sugjerojnë se përdorimi i këtyre ilaçeve mund t'i parandalojë rreth 1 milion raste të reja të Alzheimerit çdo vit”, ka thënë Jayakrishna Ambati, themelues i Qendrës për Shkencën e Avancuar të Shikimit në Universitetin e Virginias.

Këto ilaçe përdoren zakonisht për të ndalur shumëzimin e virusit HIV në trup, por studiuesit zbuluan se ato bllokojnë edhe inflamazomet – pjesë të sistemit imunitar që luajnë rol në zhvillimin e Alzheimerit.

Ambati ka shtuar gjithashtu se ekipi i tij ka zhvilluar një version më të sigurt dhe më efektiv të këtyre ilaçeve.

“Ne kemi zhvilluar edhe një ilaç të ri të quajtur K9, i cili bllokon inflamazomet dhe është një version më i sigurt e më efektiv sesa NRTIs. Ky ilaç tashmë është në prova klinike për sëmundje të tjera, dhe planifikojmë ta testojmë edhe për Alzheimerin”, ka thënë ai.

Studimi u publikua në revistën shkencore Alzheimer’s and Dementia.

Ky zbulim i ri i shtohet një liste në rritje të trajtimeve premtuese për sëmundjen e Alzheimerit. Për shembull, një substancë që gjendet te rozmarina dhe sherebela, e quajtur acid karnosik, ka treguar se rikthen kujtesën dhe ul inflamacionin e trurit te minjtë me Alzheimer, duke rikthyer funksionet e tyre mendore pranë normales.

Gjithashtu, një studim nga Stanford Medicine gjeti se të moshuarit që kishin marrë vaksinën kundër lisë së dhenve (shingles) kishin 20% më pak gjasa të zhvillonin demencë për një periudhë 7-vjeçare.

Po ashtu, shkencëtarë nga Penn State dhe Universiteti Stanford zbuluan se një ilaç kundër kancerit mund të rikthejë kujtesën dhe funksionin e trurit në modelet e Alzheimerit në fazë të hershme.