Gati dy vjet e gjysmë që kur pandemia e koronavirusit filloi, varianti më infektiv dhe më i transmetueshëm, tani ka arritur.
Valët e përsëritura të COVID-19 kanë lënë miliona njerëz të vdekur, me vetëm vaksinat që ndihmojnë të zbuten shifrat.
Tani, virusi po përhapet sërish – duke evoluuar, duke i ikur imunitetit dhe duke sjellë ngritje të rasteve dhe hospitalizimeve. Versioni i fundit, BA.5, është shenjë e qartë se pandemia është larg së përfunduari.
Nënvarianti i ri i Omicronit, bashkë me variantin tjetër të ngjashëm, BA.4, po ngritin rastet në botë – 30 për qind gjatë dy javëve të fundit, sipas Organizatës Botërore të Shëndetësisë.
Në Evropë, nënvariantet e Omicronit po shtyjnë ngritjen e rasteve me rreth 25 për qind, megjithëse Michael Ryan, drejtori i Programit për Emergjencat Shëndetësore në OBSH, ka thënë se numri mund të jetë shumë më i lartë.
BA.5 po përhapet shpejtë në Kinë duke zgjuar ankth se qytetet e mëdha shpejtë mund të rivënë në fuqi masat kufizuese dhe mbylljen që vetëm pak kohë më parë u hoqën. I njëjti variant është bërë dominues edhe në SHBA, që numëron 65 për qind të infektimeve të reja në një javë.
Eric Topol, kardiolog dhe profesor i mjekësisë molekulare në institutin e kërkimit Scripps, e ka quajtur BA.5 “versionin më të keq të virusit që e kemi parë”.
Ai ka shpjeguar se BA.5 lehtë mund t’i shpëtojë imunitetit nga infektimet e mëhershme ose vaksinave, duke rritur rrezikun për riinfektim. Edhe pse varianti nuk duket se çon në sëmundje të rëndë, Topol ka thënë se duke parë shtrirjen e variantit, pret që të sheh rritje të hospitalizimeve.
© KOHA.
