Lifestyle

Nevojat për energji zvogëlohen me moshën, prandaj ushqimi që e hani është i rëndësishëm

Personat më të moshuar kanë nevoja unike ushqyese dhe procesi i plakjes ndodh me ritme të ndryshme tek secili individ. Një kombinim i ushqimit të mirë dhe aktivitetit të rregullt fizik, mund t’i vonojë ose edhe t’i ndryshojë shumë nga problemet që lidhen me plakjen, duke i ndihmuar të moshuarit të vazhdojnë të jetojnë të pavarur dhe ta gëzojnë një cilësi të mirë të jetës.

Në përgjithësi, nevojat për energji zvogëlohen me moshën dhe kjo do të thotë që njerëzit e moshuar duhet të zgjedhin kryesisht ushqime të dendura në lëndë ushqyese, për t’u siguruar që kërkesat e tyre për lëndë ushqyese janë përmbushur. Nevojat për proteina janë zakonisht më të larta dhe burimet ushqimore të proteinave me cilësi të lartë ndihmojnë për të parandaluar infeksionet, humbjen e muskujve dhe për ta forcuar shëndetin e kockave. Provat e reja të siguruara nga hulumtimet e fundit, sugjerojnë që marrja e proteinave në mënyrë të barabartë gjatë vakteve të ditës, mund të jetë e dobishme, kështu që mos harroni ta konsumoni një vezë ose ndonjë ushqim tjetër me proteina për çdo mëngjes.

Karbohidratet komplekse si drithërat integrale, pemët dhe perimet, gjithashtu të pasura me fibra, janë burimi më i mirë i energjisë dhe me një marrje adekuate të ujit mund të ndihmojnë në lehtësimin e kapsllëkut, i cili mund të jetë një problem në moshë të shtyrë, veçanërisht tek ata persona që janë fizikisht joaktivë dhe marrin ilaçe të shumta.

Vitaminat dhe mineralet mund t’i merrni duke ngrënë shumëllojshmëri ushqimesh nga grupet kryesore të ushqimit. Kjo nënkupton konsumimin e shumë perimeve dhe frutave, kur është e mundur konsumoni më shumë drithëra në vend të drithërave të rafinuar (të tilla si buka e bardhë, ëmbëlsira dhe biskotat), mish pa dhjam, pulë dhe peshk ose bishtajore (të tilla si fasulet dhe thjerrëza) si dhe arrore dhe fara. Në dietën tuaj sugjeroheni të përfshini produkte të qumështit me pak yndyrë, si qumështi i bajameve, kosi dhe djathi si dhe yndyra të shëndetshme të cilët përfshihen tek avokado dhe sardelet, skumbri dhe salmoni.

Kalciumi është një lëndë ushqyese thelbësore ndërsa plakemi dhe kemi nevojë për një rezervë të mirë në kockat tona, për të ndihmuar në parandalimin e osteoporozës dhe frakturave. Synoni që Brenda ditës t’i konsumoni tri racione qumësht, kos ose djathë, apo mund t’i zëvendësoni ato me qumësht soje të pasuruar me kalcium, peshk të konservuar, arrore të ndryshme, bishtajore dhe tofu.

Vitamina D është thelbësore për t’i ndihmuar trupat tanë të thithin kalcium nga ushqimi, dhe burimi më i mirë I vitaminës D janë rrezet e diellit. Mundohuni të dilni në diell për të paktën 30 minuta në ditë, mundësisht para orës 11 dhe pas orës 3 të pasdites. Nëse marrja e mjaftueshme e rrezeve është e vështirë për ju, konsultohuni me mjekun tuaj për ta kompensuar mungesën e vitaminës D me marrjen e suplementeve. Folati është një vitaminë B e rëndësishme në zëvendësimin e qelizave të kuqe të gjakut, dhe mungesa e saj mund të çojë në anemi makrocitike (qeliza të mëdha të papjekura të gjakut), e cila mund të ju bëjë të ndiheni të dobët, të lodhur dhe mund të shkaktojë çrregullim në të rrahurat e zemrës. Për ta evituar mungesën e vitaminës B, sugjeroheni që të hani sa më shumë perime me gjethe, si lakra dhe spinaqi, mëlçi, agrume dhe arrore. Gjithashtu mundohuni të blini sa më shumë lëngje portokalli dhe drithëra të pasuruar me folate.

Me Vitaminën B12 trupi furnizohet pothuajse tërësisht nga ushqimet shtazore, si mishi (sidomos mëlçia), vezët, prodhimet e detit (sardelet) dhe produktet e qumështit. Marrja joadekuate e vitaminës B12 mund të çojë në anemi të dëmshme të karakterizuar nga lodhja, gulçimi, humbja e oreksit dhe rënia në peshë. Prandaj është e nevojshme që brenda ditës ta hani të paktën një porcion me mish të kuq, pulë, peshk ose vezë, dhe dy porcione me produkte qumështi.

Për t’u ndier sa më mirë preferohet t’i hani të paktën tri vakte në ditë. Anashkalimi i mëngjesit mund të jetë joproduktiv për trupin. Prandaj mos hezitoni të përfshini shumë perime dhe fruta të ndryshme në dietën tuaj, sepse ato do t’ju ndihmojnë ta mbani një peshë të shëndetshme.

Në moshë të avancuar njerëzit të cilët konsumojnë pak ushqime që janë burim i pasur i energjisë, mund të preken nga problemet e shoqëruara me humbje të peshës. Më të rrezikuarit janë personat që tashmë e kanë humbur njërin bashkëshort, sepse ushqyerja është një proces i cili shkon me shoqëri. Kur ushqehemi bashkë me dikë, lehtësohet dëshira për ngrënie dhe rritet kënaqësia dhe shijimi i ushqimit.