Rritja në mjedise më të gjelbëruara urbane mund ta rrisë shkallën e inteligjencës te fëmijët dhe të ulë nivelin e shfaqjes së sjelljeve problematike, ka treguar një studim.
Studimi i ndërmarrë me më shumë se 600 fëmijë të moshave ndërmjet 10 dhe 15-vjeçare ka treguar se një shtim prej vetëm 3 për qind e nivelit të gjelbërimit në lagjet e tyre ka ndikuar në ngritjen e shkallës së inteligjencës së tyre për mesatarisht 2.6 pikë. E ky ndikim është evidentuar si në zonat e pasura ashtu edhe në ato më të varfra.
Ka pasur deri më tani dëshmi të konsiderueshme se hapësirat e gjelbëruara i përmirësojnë aspektet e ndryshme të zhvillimit kognitiv të fëmijëve, por kjo është hera e parë që hulumtuesit e studiojnë ndikimin në inteligjencë. Shkaku ende nuk dihet saktë, por mund të jetë i lidhur me nivelin më të ulët të stresit, mundësisë më të madhe për lojë dhe kontaktit social e mjedisit më të qetë.
Rritja e shkallës së inteligjencës është veçanërisht e rëndësishme për ata fëmijë të fundit të spektrit, ku edhe ngritja më e vogla mund të bëjë një dallim të madh, kanë thënë studiuesit.
“Ka përherë e më shumë dëshmi se hapësirat e rrethuara me gjelbërim janë të ndërlidhura me funksionin tonë kognitiv, si aftësia për mbamendje dhe vëmendja”, ka thënë Tim Nawrot, profesor i epidemiologjisë ambientale në Universitetin Hassel në Belgjikë, ku edhe është kryer studimi.
“Çfarë ky studim i kontribuon aspektit të inteligjencës është matja më e përpiktë, më e bazuar. Mendoj se arkitektët apo planifikuesit e urbanizmit duhet ta bëjnë prioritet investimin në hapësira të gjelbra, për shkak se është përnjëmend vlerë që të krijohet një ambient optimal që fëmijët ta zhvillojnë potencialin e tyre të plotë”.
Artikullin e plotë mund ta lexoni në gazetën Koha Ditore. Klikoni këtu për t’u regjistruar falas.
© KOHA. Të gjitha të drejtat janë të rezervuara.
