Franca po lanson një skemë në formë bonusesh për të bindur konsumatorët që të qepin rrobat dhe këpucët e përdorura në vend që t'i hedhin dhe të blejnë të reja, shkruan BBC.
Nga tetori, bonusi do të vijë në formën e një zbritjeje për qepje me vlerë midis 6 deri 25 euro.
Berangere Couillard, e cila është ministrja e re e Ekologjisë, u ankua se 700 mijë ton veshje përfundonin në deponi në Francë çdo vit.
Qeveria do të kontribuojë me 154 milionë euro për financimin e bonusit gjatë pesë vjetëve.
Refashion, një grup të cilit i është kërkuar të krijojë skemën, thotë se 3.3 miliardë artikuj veshjesh, këpucësh dhe tekstile shtëpiake dolën në treg vitin e kaluar në Francë.
Por jo të gjithëve u bën përshtypje qasja e qeverisë, veçanërisht bizneseve të cilat kundërshtojnë skemën.
Industria e modës është një nga sektorët më të mëdhenj të Francës, me rreth 66 miliardë euro xhiro vitin e kaluar dhe mijëra vende pune.
Megjithëse Franca është eksportuesi i katërt më i madh i modës në BE, industria ka pasur rënie vitet e fundit. Faqja e internetit Fashion United thotë se në vitin 2020, konsumatorët francezë shpenzuan mesatarisht 430 euro për veshje, nën mesataren e BE-së.
