Policët në Florida arrestuan dy hajdutë të paaftë, pasi njëri dyshohet se thirri ndihmën e shpejtë, me qëllim që t'i kërkonte policisë ndihmë për të lëvizur sendet nga një shtëpi në të cilën kishin hyrë, thanë autoritetet.
Zinxhiri i ngjarjeve filloi të shpaloset rreth orës 1 të mëngjesit të së shtunës në Kissimmee. Një dyqan zbritjeje “Dollar General” u grabit dhe u vodhën "shumë sende", tha zyra e sherifit të qarkut Polk, duke dokumentuar incidentin e supozuar në një deklaratë arrestimi dhe një postim në Facebook.
Ndërsa policët shqyrtonin pamjet e sigurisë nga dyqani, njëri njohu një të dyshuar, të identifikuar si Martin Gonzalez-Garcia, por autoritetet nuk mundën ta gjenin menjëherë, shkroi The Guardian.
Më vonë atë ditë, megjithatë, pati një thirrje urgjence në të cilën "askush nuk foli".
Kur policët arritën në shtëpinë nga erdhi thirrja, u duk se askush nuk jetonte atje. Oficerët megjithatë gjetën "një derë të pasigurt" dhe hynë në shtëpi "për t'u siguruar që gjithçka ishte në rregull".
Atje ata gjetën Gonzalez-Garcia dhe një grua, Ashializ Roldan-Oscacio, e përshkruar si e dashura e Gonzalez-Garcias. Asnjëri nuk kishte "lidhje me shtëpinë", thanë autoritetet.
Gonzalez-Garcia u arrestua për grabitje në dyqan dhe në shtëpinë e pabanuar. Roldan-Oscacio u akuzua për vjedhje në shtëpinë bosh.
“Dhe më pas erdhi pranimi befasues i Lizit…” tha zyra e sherifit në postimin në Facebook.
“Ajo tha se telefonoi ndihmën e shpejtë me qëllim që forcat e rendit dhe ligjit ta ndihmonin atë dhe Martinin për të lëvizur sendet e tyre nga shtëpia (ajo që po vidhnin), dhe ata po përpiqeshin të shkonin në aeroport, sepse donin të shkonin në Neë York për fundjavë”.
"Policët i ndihmuan me gjërat e tyre dhe i futën në veturë për një udhëtim, por jo për në aeroport", tha zyra e sherifit. “Ishte për Polk Pokey. Dhe ata janë të mirëpritur të qëndrojnë atje gjatë gjithë fundjavës. Gjithsesi, Polk Pokey është shumë më i mirë se Neë Yorku”.
Pokey është një term zhargon amerikan për "burg".
Sipas deklaratës pas arrestimit, Gonzalez-Garcia tha se "ai e kreu vjedhjen në Dollar General sepse i duhej të merrte sende për t’i shitur për të fituar para".
© KOHA.
