Duke mos ofruar as pamje nga dritarja, as qasje të lehtë në tualet, ulësja e mesme është vendi më pak i dëshirueshëm gjatë një fluturimi.
Në fakt, vetëm 0.6% e më shumë se 7,500 e të anketuarve preferojnë ulësen e mesme gjatë një fluturimi, sipas një sondazhi të fundit të kryer nga kompania ajrore Virgin Australia, raportoi CNN-i të martën.
Ky numër së shpejti mund të rritet nëse skema e linjës ajrore për t'i bërë pasagjerët të rezervojnë me dëshirë ulësen e mesme shënon sukses.
Virgin Australia ka lansuar Middle Seat Lottery, një lotari speciale me vlerë rreth 145,000 dollarë. Dhe është e hapur vetëm për ata që ulen në ulësen e mesme, vullnetarisht ose pa dashje, gjatë një fluturimi.
"Virgin Australia është një linjë ajrore që po i bën gjërat ndryshe dhe ne po argëtohemi shumë duke krijuar risi emocionuese për ta bërë çdo pjesë të përvojës së udhëtimit më të mrekullueshme”, ka thënë Jayne Hrdlicka, shefe ekzekutive e Virgin Australia Group.
Shpërblimet mund të përfshijnë edhe fluturime falas.
Që tani deri më 23 prill 2023, çdo anëtar i moshës mbi 18 vjeç e lart që është ulur në një ulëse të mesme mund të përdorë aplikacionin e linjës ajrore për t'u regjistruar në lotari.
Çdo javë, një çmim i ndryshëm do t'i jepet fituesit përmes shortit.
Për tifozët e futbollit ka fluturime dhe bileta për në finalen e madhe të Ligës Australiane të Futbollit, si dhe qasje ekskluzive në drekën para lojës dhe pas festës.
Pasi njoftimi u postua në kanalet e mediave sociale të linjës ajrore më 24 tetor, disa komentues ranë dakord se ishte një "plan brilant", ndërsa të tjerë thanë se asgjë nuk mund t'i shtynte kurrë të ulen në ulësen e mesme.
