Trashëgimtaret kërkojnë t’u njihet e drejta e pronës në qendër të Prishtinës

Gjykata Kushtetuese ka mbajtur të mërkurën seancë dëgjimore lidhur me çështjen pronësore për një parcelë në qendër të kryeqytetit, e për të cilën Afërdita Nura-Lama bashkë me motrat e saj kërkojnë të drejtën e pronës

Katër vajzat e ish-mësimdhënëses Melihate Nura kanë vazhduar betejën për t’iu njohur e drejta e trashëgimisë në pronën në qendër të Prishtinës, e cila i ka takuar nënës së tyre.

Për këtë çështje të mërkurën është mbajtur dëgjim publik në Gjykatën Kushtetuese, lidhur me vlerësimin e kushtetutshmërisë së aktgjykimit të Supremes.

Afërdita Nura-Lama, Eufrozina Nura, Diana Nura-Sahatçiu dhe Servete Nura pretendojnë se për njësinë e banimit është marrë vendim brenda tri ditësh nga Komuna e Prishtinës për rrënimin e objektit.

Kryetari i Kushtetueses, Nexhmi Rexhepi, ka thënë se parashtruesit kanë pretenduar se u janë shkelur të drejtat e pronës.

“Parashtrueset e kërkesës pretendojnë se atyre u janë cenuar të drejtat e pronës, të drejtat e garantuara me nenin 46 të Kushtetutës së Kosovës për shkak të refuzimit që kërkesa e tyre të regjistrohet në regjistrin kadastral si bashkëpronare në parcelën kadastrale me numër reference 5937-0 në të cilën parcelë, e cila ka ekzistuar objekti kontestues, përkatësisht prona kontestuese”, ka thënë Rexhepi.

Palë në këtë proces janë parashtrueset e kërkesës, Komuna e Prishtinës, Agjencia për Krahasim dhe Verifikim të Pronës dhe Agjencia Kadastrale.

Parashtruesja e kërkesës, Afërdita Nura-Lama, ka thënë se trashëgimtaren e shtëpisë, Melihate Deva-Nura, Gjykata Komunale e pati shpallur trashëgimtare të pronës në vitin 2005, porse Themelorja dhe Apeli janë bazuar në një dokument joekzistues.

“Me vendime të njëpasnjëshme, vite e vite me radhë, shkelet e drejta e pronares Melihate Nura në pronësi prej konstatimit për rindërtim të datës 17.10.2007 nga drejtoria, përkatëse te refuzimi i së njëjtës drejtori, për shkak të rregullimit dhe planifikimit të hapësirës, edhe pse të gjitha shtëpitë përreth janë private dhe janë rinovuar dhe janë rindërtuar, vetëm shtëpia e pronares jo. Shkelje e nenit 46 të Kushtetutës dhe deklaratës së lirive të drejtave të njeriut neni 17”, ka thënë Nura-Lama.
Zyrtarja ligjore në Komunën e Prishtinës, Rina Govori, ka theksuar se ky institucion e ka njoftuar palën paditëse se objekti në parcelën në fjalë nuk ekziston. 

“Komuna e Prishtinës nuk e ka kontestuar pronësinë që e ka fituar pala paditëse në bazë të kontratës të shitblerjes në vitin 1993, dhe të njëjtën e ka pasur të regjistruar në bazë të aktvendimit të vitit 1993 në bazë të aktvendimit të gjykatës komunale, mirëpo e njëjta nuk ka mundur të evidentohet në certifikatë të pronësisë, sepse nuk ka ekzistuar kadastra etazhore deri në vitin 2012”, është shprehur Govori.

E Nadir Shyqeriu, përfaqësues nga Agjencia e Kadastrës, ka thënë se për t’u regjistruar një objekt në kadastër, së pari duhet që të identifikohet fizikisht në terren. 

“Kërkesa kryesore e ligjit është të bëhet identifikimi dhe kushtimisht duhet matur njësia kadastrale apo objekti me dimensione që ka. Kjo nuk ka qenë e mundur të bëhet për shkak se, siç u cek, objekti ka qenë i rrënuar në atë kohë, po flasim për vitin 2018-2019 dhe mbi bazën e kësaj Agjencia e Kadastrës e Kosovës e ka refuzuar ankesën e palës dhe nuk mund të evidentohet një njësi kadastrale in-ekzistente”, ka thënë ai.

Veton Demi, nga Agjencia Kosovare për Krahasim dhe Verifikim të Pronës, ka theksuar se më 2007 kanë pranuar kërkesë për të drejtën e pronësisë mbi pronën banesore.

“Zyrtarët e Agjencisë kanë vizituar pronën më 22.1.2008, me qëllim të njoftimit të personave të interesuar për procedurën, e cila është duke u zhvilluar dhe në pronë nuk është gjetur askush dhe prona është gjetur banesë e dëmtuar”, është shprehur ai.

Pretendimet e zyrtarit të Agjencisë për Krahasim dhe Vlerësim të Pronës, se prona është vizituar më 2008 i ka hedhur poshtë parashtruesja e kërkesës, Afërdita Nura-Lama. Ajo ka thënë se objekti i banimit nuk ka qenë aq i dëmtuar dhe nuk ka paraqitur rrezik.

E kryetari i Kushtetueses Rexhepi ka thënë se vendimi do të ofrohet me shkrim në ditët në vijim.