LAJMET E MBRËMJES

Kryetari i ri i Zubin-Potokut thërret serbët t’i bashkohen ekipit të tij qeverisjes

Në fshat është betuar edhe kryetari i Zubin-Potokut, Izmir Zeqiri. Në Zyrën për Komunitete në Çabër, ai është zotuar të marrë parasysh kërkesat e serbëve, që e përbëjnë shumicën në këtë komunë veriore, e po ashtu i ka ftuar profesionistët nga komuniteti serb t’i bashkohen ekipit të tij qeverisës. Shprehu bindjen se shpejt do të kthehet në objektin kryesor të Komunës

Izmir Zeqiri është betuar të enjten në Çabër, në objektin ku ka punuar edhe më herët si zyrtar komunal.

Mandatin kryetari i ri i Zubin-Potokut e mori në Zyrën për Komunitete dhe Kthim, prej ku ai më herët lëshonte certifikata. Ai u premtoi banorëve serbë të Komunës, që janë shumicë, se do t’i përfillë kërkesat e tyre dhe i ftoi për bashkëpunim. 

“Uroj që ne tani e tutje të jemi në nivel të përgjegjësisë më të lartë duke u ofruar qytetarëve të Komunës së Zubin-Potokut pa asnjë dallim, të gjitha shërbimet, të gjitha kërkesat, t'i plotësojmë të gjitha kërkesat e qytetarëve duke përfshirë sidomos komunitetin shumicë serb”, tha Zeqiri.

Teksa ai u betua jashtë objektit kryesor të Komunës, puna e institucioneve paralele të Serbisë që shfrytëzojnë të njëjtën hapësirë vazhdoi gjatë së enjtes.

Zeqiri tha se synon të kthehet aty dhe se e ka për qëllim që shumicën e udhëheqësve të drejtorive komunale t’i ketë profesionistë nga komuniteti serb.

“Nuk e shoh aq të rëndësishme se ku mbahet betimi. Unë e shoh të rëndësishme që së shpejti do të jemi në posedim të të gjitha atyre zyrave dhe të gjitha dikasteret do të drejtohen me ligjet e Republikës së Kosovës…Jemi në pritje dhe një kohë të shkurtër do të presim, do të ofertojmë. Ndoshta procesin zgjedhor e kanë bojkotuar, mirëpo ne jemi të hapur sikur të ishim bashkë të votuar, kështu që uroj që të kemi në kabinetin tim shumicën e drejtimit të dikastereve ta drejtojnë profesionistë të shumicës serbe, ashtu siç i kemi raportet etnike”, deklaroi ai.

Ambasadori amerikan, Jeffrey Hovenier, ka thënë në disa raste se kryetarët e rinj të komunave me shumicë serbe në veri “duhet të kenë rol administrativ, e jo politik” për shkak të bojkotimit të zgjedhjeve nga serbët. Mirëpo Zeqiri u shpreh se mandati i tij është i plotë dhe në përputhje me ligjet dhe Kushtetutën.