Dy nxënës të klasës së nëntë të shkollës fillore “Faik Konica” në Prishtinë, kanë marrë plagë të rënda trupore, si pasojë e djegies së shkaktuar pas kontaktit me energjinë elektrike në trafon që ndodhet në hapësirat e oborrit të këtij institucioni arsimor.
Ani se për shkaqe sigurie trafoja do të duhej të ishte e mbyllur, dryni asaj iu vu tek pas incidentit që ndodhi në mëngjesin e së martës. E të dy 15-vjeçarët, pas kontaktit me rrymën, u dërguan menjëherë në Emergjencë për trajtim mjekësor.
Ejup Govori, mjek kujdestar në Emergjencë, ka thënë se gjendja e tyre është stabile, megjithëse kanë pësuar plagë dhe djegie të rënda, për ç’arsye njëri prej tyre i është nënshtruar edhe operacionit.
“Janë sjellë me autoambulanca nga Urgjenca e qytetit në gjendje stabile mirëpo me plagë, djegie serioze. Lëndimet janë serioze, sigurisht kontakti është me rrymë të tensionit të lartë, sepse vetëm intensiteti i rrymës me tension të lartë shkakton këso djegie. Djegiet janë serioze. Janë të shkallës 2A, 2B, por në disa regjione të trupit janë edhe të shkallës së tretë”, ka thënë Govori.
Sidomos gjendja shëndetësore e njërit prej nxënësve është më serioze, ka thënë ai. “Tjetri ka djegie shumë serioze në disa regjione, në dy shuplakat, në regjionin femural në të dyja anët, në njërën anë e ka një shkallë shumë të rëndë që ka shkaktuar vdekje të indit, të qelizave të këtij regjioni dhe djegie në sipërfaqe të anës së djathtë të shpinës dhe më poshtë se gjuri. Është një djegie e rëndë. Ky pacient është transferuar në sallën e operacionit dhe është preferuar nga kirurgu plastik që të transferohet në mjekim intensiv. Vetë transferi në mjekim intensiv tregon për gjendjen e tij që është jashtëzakonisht serioze”, ka shtuar Govori.
Hilmi Duraku, gjyshi i nxënësit që pësoi lëndime më të lehta, tregoi për bisedën që e pati me nipin e shtrirë në Emergjencë.
“Është jashtë rrezikut fëmija. Fola me të. Thotë kam tentuar me nxjerrë shokun, e kam dëgjuar britmën dhe unë kam tentuar me nxjerrë dhe jam lënduar edhe vetë”, ka thënë Duraku.
E në kushtet anonimiteti, rastin e ka sqaruar një nga nxënësit që ishte prezent kur ndodhi incidenti. Ai tha se gjithçka ndodhi gjatë periudhës së pushimit të gjatë.
“Ai vend ka qenë i mbyllur për disa kohë. Por nuk e di kush e ka hapur. Kur kemi shkuar aty, jena kanë mirë, por kur e kemi dëgjuar zërin e arsimtarit jemi frikësuar se mos po na bërtet, ndëshkon dhe ai ka bë panik, është mundu me u largu ose me u fshehë, nuk e di, dhe fatkeqësisht i ka prekë shufrat metalike dhe ka pasur tension të lartë”, ka thënë një nxënës për KOHËN.
Hollësi rreth rastit nuk kanë dhënë nga stafi i shkollës. As drejtoresha Jehona Oruqi, që gjatë ditës qëndroi në Emergjencë dhe dha deklaratë edhe në polici, nuk pranoi që të deklarohet.
Tani rasti është nën hetimin e organeve të hetuesisë, si vepër penale e “shkaktimit të rrezikut të përgjithshëm”.
“Lidhur me këtë rast, ju njoftojmë se prokurori kujdestar i është përgjigjur vendit të ngjarjes dhe në koordinim me Policinë i kanë ndërmarrë të gjitha veprimet e nevojshme hetimore në vendin e ngjarjes. Gjithashtu, Prokurori i Shtetit i ka vizituar të miturit në QKUK, të cilët janë duke marrë trajtimin mjekësor dhe fatmirësisht, janë jashtë rrezikut për jetë. Rasti është iniciuar për hetim në drejtim të veprës penale: “Shkaktimi i rrezikut të përgjithshëm”, derisa hetimet janë duke u zhvilluar me qëllim të ndriçimit të rrethanave të këtij rasti”, thuhet në njoftimin e Prokurorisë Themelore të Prishtinës.
KOHA ka provuar të marrë një qëndrim edhe nga KEDS-i se përse trafoja ka qenë e hapur, porse zëdhënësi i saj, Lulzim Krasniqi, ka thënë se nuk posedon informata, ndonëse zyrtarë të kësaj kompanie kanë qenë të pranishëm në vendngjarje.
© KOHA. Të gjitha të drejtat janë të rezervuara.
